Geroosterde kaasbroodjie
(bl. 78) Een van my beste trooskosse as niemand kyk nie, is om geel cheddar-kaas op gewone witbrood in die mikrogolf te laat smelt en dit dan te eet saam met soet koejawelsap. Ja, ek weet! Maar hier is ’n weergawe wat jy sonder skaamte kan eet.
genoeg vir 4
2 x 500 g-bakkies kersietamaties
1 rooi brandrissie, fyngekap
100 g (125 ml) klam bruinsuiker ( muscovado)
80 ml sjerrie- of rooiwynasyn
8 snye suurdeegbrood
botter om broodjie te smeer
40 ml Dijon-mosterd
200 g mozzarella-kaas, in skywe gesny
Halveer kersietamaties en plaas saam met brandrissie, suiker en asyn in middelslag-pot. Bring tot kookpunt en verlaag hitte. Laat 20-25 minute stadig prut tot blatjang vorm (sien wenk). Smeer snye brood met botter aan een kant en mosterd aan ander kant. Plaas 4 snye met botterkant na onder op werkvlak en pak skywe kaas bo-op. Bedek met oorblywende broodsnye, botterkant buite. Verhit riffelpan tot warm en braai broodjies stadig aan weerskante tot goudbruin en kaas gesmelt het. Sit warm voor met tamatieblatjang. (My mond water!)