Vars, of gevries, dis pure gesondheid
Dit bevat antioksidante, wat help om vry radikale te beheer. Dis nou molekules wat selle kan beskadig. Bloubessies, swartbessies en frambose het inderdaad meer antioksidante as enige ander vrug wat gereeld geëet word, behalwe granate, volgens ’n Amerikaanse studie. Bessies kan dalk bloedsuikervlakke en insulien
weerstandigheid help verbeter as dit saam met koolhidraatryke kosse geëet of by smoothies gevoeg word. Dit bevat baie vesel, wat jou aptyt kan help verminder en dus die aantal kJ’s kan verminder wat jy inneem. Dis dalk laag in kJ, maar ryk aan verskeie vitamiene en minerale, veral vitamien C en mangaan. Die antioksidante help om inflammasie te beveg. Oorgewig mense wat ’n aarbei-drankie saam met ’n hoë-kJ-hoëvet-maaltyd neem, se inflammasie-merkers in die bloed verminder beduidend meer teenoor die groep wie se drankie sonder aarbeie is, het ’n studie in die British Journal of Nutrition bevind. Dit kan help om die risiko vir hartsiekte en ander gesondheidsprobleme te verminder. Bessies is ook goed vir jou vel en kan dalk selfs help om plooie te verminder. Dit maak sin, aangesien antioksidante vry radikale help beheer, een van die hoofoorsake van velskade wat tot veroudering bydra. Verskeie antioksidante in bessies, insluitend ellagiensuur, resveratrol en antosianien, kan jou dalk selfs teen kanker help beskerm. Dit verminder merkers geassosieer met die groei van kankergewasse (by diere en mense), is bevind. Dit kan help om cholesterolvlakke by vetsugtige mense te verlaag. En verbeter byvoorbeeld die werking van sowel gesonde mense as dié met metaboliese sindroom en rokers se slagare, het verskeie studies bevind. >
Bronne: Mariza van Zyl, geregistreerde dieetkundige (www.bettereat. net), www.healthline.com, nutritiondata.self.com, webmd.com