3 warm herfsslaaie

Kuier dié herfs met slaai as hoofgereg, maar moenie dink dis net blare nie! Hierdie drie is luuks en word warm voorgesit

Blomkoolslaai

As jy nog nie blomkool in die oond gerooster het nie, probeer gerus. Jy word beloon vir jou moeite. genoeg vir 4

500 g blomkoolstukke 45 ml kanola-olie 30 ml heel komynsaad sout en varsgemaalde swartpeper 50 ml olyfolie 45 ml sjerrieasyn 30 ml dijonmosterd 45 ml heuning 1 brandrissie, baie fyn gekap 50 g rosyntjies 100 g gevlokte amandels 1 x 80 g-sak babaspinasie 140 g suikerertjies ( sugar snap peas)

Verhit oond tot 180 °C. Plaas blomkool in oondroosterpan en sprinkel kanolaolie, komyn, sout en peper oor. Oondrooster 15-20 minute oop of tot blomkool goudbruin en gaar is. Meng terwyl blomkool in oond is die olyfolie, asyn, mosterd, heuning en brandrissie met draadklitser vir slaaisous. Plaas warm blomkool, rosyntjies, amandels, spinasie en suikerertjies in groot slaaibak. Skep slaaisous oor en meng deur met twee groot opskeplepels tot alles met sous bedek is. Sit voor.

Aartappelslaai met gebraaide peer, okkerneut en roquefort

(bl. 130) Peer, okkerneut en roquefort is beste maats en maak ’n gewone aartappelslaai weelderig. genoeg vir 4

200 g baba-aartappels, gehalveer 50 ml avokado-olie sout en varsgemaalde swartpeper 3 pere met skil, gehalveer en stronk verwyder 1 x 100 g-pakkie okkerneute, grofgekap 4 takkies vars salie sap en gerasperde skil van 2 suurlemoene 1 x 40 g-pakkie roketblare 200 g roquefort- of enige ander bloukaas

Verhit oond tot 220 °C. Plaas aartappels in kookwater en kook vir 8 minute. Dreineer en gooi in oondroosterpan. Sprinkel avokadoolie oor en plaas in oond. Oondrooster 10-15 minute of tot goudbruin en bros. Dreineer op kombuispapier en geur goed met sout en peper. Gooi gebruikte olie in oondroosterpan in groot braaipan en verhit. Plaas pere met gesnyde kant na onder in pan en braai 5-8 minute of tot pere begin verbruin. Voeg neute en salie by en meng deur. Voeg gaar aartappels en sap en skil van suurlemoene by en geur goed met sout en peper. Plaas roket op dienbord en skep warm slaai bo-op. Krummel kaas oor. Sit voor.

Koeskoes-en-salmslaai

(bl. 131) Dié een bly my gunsteling. genoeg vir 4

300 g salmfilette (of forel) sout en varsgemaalde swartpeper hand vol koljanderblare 80 ml sojasous 45 ml kanola-olie 1 cm-stuk vars gemmer, geskil en fyngerasper 2 knoffelhuisies, fyngekap 30 g babaslaaiblare

SUURLEMOEN-KOESKOES 100 g (140 ml) volgraankoeskoes 250 ml hoenderaftreksel 200 g groen olywe, ontpit en grofgekap 1 ingelegde suurlemoen, fyngekap sap en gerasperde skil van 1 suurlemoen

Verhit oond tot 180 °C. Plaas filette op kleefvrye bakplaat met velkant na onder. Geur goed met sout en peper. Meng koljander, sojasous, olie, gemmer en knoffel. Smeer mengsel oor filette. Bak 15-20 minute of tot goudbruin en gaar. Haal uit oond en hou eenkant. Plaas koeskoes in glasmengbak. Bring aftreksel tot kookpunt. Gooi oor koeskoes en meng deur. Maak bak toe met kleefplastiek en laat staan sowat 15 minute of tot al die aftreksel geabsorbeer is. Gebruik vurk en roer koeskoes tot korrels los is van mekaar. Voeg olywe en al die suurlemoen by. Geur goed met sout en peper en meng deur. Skep op dienbord. Vlok vis in growwe stukke en pak op koeskoes. Sprinkel slaaiblare oor. Sit voor met ekstra koljanderblare.