9 VRAE AAN Tannie Poppie
1 Hoe maak jy die perfekte roosterkoek? Jy sit Jesus se liefde in dit in. Terwyl ek die deeg knie en die roosterkoeke maak, praat ek gedurig met die Here. En so plaas mens dan Jesus se liefde in die roosterkoek, een knie op ’n slag.
2 Hoe verkies jy jou roosterkoek? Ek eet nie meer so graag brood nie – ek moet baie honger wees voor ek ’n roosterkoek sal eet – maar wanneer ek hom eet, hou ek daarvan met botter, kaas en biltong op. My klante is ook gaande oor hierdie kombinasie. Verder is roosterbrood met botter, uie-entamatiesmoor, kaas én biltong sowel as die hot cross bun- roosterbrood met rosyntjies en pypkaneel ook groot gunstelinge onder my klante.
3 Wat is jou kindertydherinneringe aan roosterkoek? In die jare toe ek jonk was, was daar nie iets soos krag nie en moes ons vuurmaak in die stoof. Eendag het ons toe nie genoeg kole nie en het ek buite gaan vuurmaak. Ek is die oudste kind en moes al die werk doen. Ek het brood op die vuur gemaak, maar was naderhand so moeg, my oë kon nie oopbly nie. Ek het die brood in die skottel gesit en dit buite vergeet toe ek later gaan slaap het. Die volgende oggend toe ons buite kom, het die honde al die roosterbrode opgevreet. Ek het ’n groot pak slae gekry! Tog het dit my nie gestop nie, want jare later op Laingsburg het ek besef mense soek altyd brood en só het ek toe op die ou einde begin roosterkoeke bak.
4 Móét mens jou eie deeg maak of kan jy dit sommer koop? Ek sal nie deeg by die winkel koop nie. Daai winkeldeeg word geknie met ’n masjien en in die yskas gesit. Dit droog dan uit. Maak jou eie deeg!
5 Hout of kole? Ek verkies om vuur te maak met doringhout. Ek gebruik net kool as ek baie besig is, want dan kan mens die temperatuur mooi beheer.
6 Jy was onlangs in Italië. Hoe sal jy ’n roosterkoek ’n Italiaanse flair gee? In Rome bak hulle nie roosterkoeke nie. Hulle bak sulke oondkoeke – in die oond! Dit is vierkantig en word in driehoeke gesny, met maalvleisbolle op. So ja, dis seker hoe mens ’n roosterkoek ’n Italiaanse flair gee.
7 Hoe was die kos in Italië? Jong, dit was anders. Die mense wou op ’n stadium vir my seekat gee om te eet, maar toe maak ek sommer asof ek nie honger is nie.
8 Enige wenke vir roosterkoeke? Die roosterkoeke vries baie lekker en baie mense sê dis vir hulle dan nog lekkerder as so direk van die rooster af.
9 Enige laaste woorde, Tannie Poppie? Brood is so eenvoudig, maar kyk waar het dit my gebring.