DIE WARE JAKOB

Die regte, egte SA melktert met skilferkors. In 2007 het Deona Tait van Pretoria dié wenresep met ons gedeel. genoeg vir 2 terte

KORS 450 g (490 ml) botter 420 g (750 ml) koekmeel, plus ekstra vir uitrol 2 ml sout 190 ml yswater 1 eiergeel 15 ml asyn

VULSEL 42 g (75 ml) koekmeel 50 ml mielieblom 100 g (125 ml) suiker 675 ml melk 10 ml botter 2 stukke pypkaneel 2 eiers, geskei 4 druppels amandelgeursel

ml kremetart 25 ml suiker

Kors Rasper kwart van botter by meel en sout en vryf in tot tekstuur van klam seesand. Voeg yswater, eiergeel en asyn by en meng tot deeg. Gooi deegbal 150 keer op werkvlak. Laat rus 15 minute. Sprinkel werkvlak met meel en rol deeg uit tot 5 mm dik. Rasper tweede kwart van botter op twee derdes van deeg en vou in drie (sodat daar botter tussen elke laag is). Verseël kante met koekroller. Rol deeg weer uit en laat rus 15 minute. Herhaal met laaste twee kwarte botter. Laat rus deeg vir 2 uur in yskas. Rol deeg op meelbestrooide werkvlak tot 5 mm dik uit. Sny kante reguit met ’n skerp mes. Spuit ’n 25 cm-emaljebord van 3 cm diep met kleefwerende kossproei en voer uit met deeg. Sny ’n reep van 1 cm breed uit orige deeg en plaas reg rondom rand van uitgevoerde bord. Hou in yskas. Vulsel Verhit oond tot 180 °C. Meng meel, mielieblom, suiker en melk in groot pot. Klits tot glad. Voeg botter en kaneel by. Plaas oor lae hitte en roer met draadklitser tot mengsel begin verdik – soos witsous. Hou aan roer tot gaar, 5-8 minute. Verwyder van hitte en laat afkoel tot louwarm. Voeg eiergele en amandelgeursel by. Klits eierwitte, kremetart en suiker tot sagte punte vorm en vou by mengsel in. Giet in kors en bak 25-30 minute of tot goudbruin bo-op. Laat afkoel en sit voor.