Franse vlatert

(bl. 98) Het jy al Frankryk besoek, sal jy weet dié vlatert is om elke hoek en draai te kry. Dit was toe ek die eerste keer dié tert geëet het, dat ek besef het elke land het sy eie weergawe van melktert. genoeg vir een 22 cm-tert

KORS 155 g (170 ml) botter 280 g (500 ml) koekmeel 45 ml versiersuiker 45 ml yswater 1 eiergeel

VULSEL 600 ml melk 150 ml room 3 eiers 150 g (185 ml) strooisuiker 10 ml vanieljegeursel of pitjies van 1 vanieljepeul 70 g (145 ml) mielieblom 50 g (55 ml) botter 45 ml appelkooskonfyt 10 ml water

Plaas botter, meel en versiersuiker in ’n voedselverwerker. Verwerk tot botter en meel goed gemeng is. Meng yswater en eiergeel en gooi by terwyl verwerker loop. Meng tot deegbal vorm. Vou deeg in kleefplastiek toe en laat rus 30 minute in yskas. Rol deeg baie dun uit op ’n meelbestrooide werkvlak. Voer ’n losboompan van 23 x 4 cm daarmee uit. Plaas uitgevoerde kors in yskas terwyl jy die vulsel maak. Verhit oond tot 180 °C. Meng melk en room saam in ’n kastrol en bring tot kookpunt. Klits eiers, suiker, vanielje en mielieblom saam tot lig. Voeg warm melkmengsel by en meng goed. Gooi mengsel terug in kastrol. Voeg botter by. Kook vla tot dik terwyl jy heeltyd roer met ’n draadklitser. Verwyder van hitte en gooi warm vla in uitgevoerde kors. Plaas in oond en bak 45 minute. Haal uit oond en laat afkoel tot kamertemperatuur. Plaas in yskas tot heeltemal gestol. Smelt appelkooskonfyt en water saam in mikrogolfoond. Smeer oor koue tert en sit voor.