Jodetert

(bl. 99) Daar is geen historiese verklaring vir dié tert se naam nie. Wat ons wel kan aanneem, is dat daar ’n Joodse konneksie is omdat die tert sewe lae het. Maar niemand is seker nie. Die waarheid is wel dat die tert tyd verg, maar proe jy dit die eerste keer, weet jy dit was die moeite werd. genoeg vir 1 tert

KORS 250 g (270 ml) sagte botter 300 g (535 ml) koekmeel, plus ekstra vir uitrol 240 g (285 ml) strooisuiker 10 ml bakpoeier 1 ml sout 2 eiers, geklits

VULSEL 3 eiergele 65 g (75 ml) strooisuiker 25 ml koekmeel 25 ml mielieblom 300 ml melk

Kors Verhit oond tot 180 °C. Plaas botter, meel, strooisuiker, bakpoeier en sout in voedselverwerker en pols by hoë spoed tot gemeng. Voeg eiers by terwyl menger loop en meng tot bestanddele ’n deegbal vorm. Plaas in yskas vir 20 minute. Verdeel deeg in 7 ewe groot porsies. Spuit 8 velle bakpapier goed met kleefwerende kossproei. Plaas een deegbal op ’n vel papier en sprinkel goed met meel. Plaas nog ’n vel bakpapier bo-op en rol deeg uit tot 5 mm dik. Verwyder boonste vel papier en plaas op bakplaat. Bak vir 8-10 minute of tot goudbruin. Herhaal met res van deeg. Vulsel Klits eiergele, suiker, meel, mielieblom en helfte van melk in ’n mengbak tot gladde mengsel. Bring res van melk tot kookpunt en gooi oor eiermengsel terwyl jy klits. Gooi mengsel deur ’n sif terug in pot en klits oor lae hitte tot gladde, dik tekstuur, soos witsous. Gooi mengsel in skoon bak en plaas kleefplastiek direk op oppervlak van vla. Laat afkoel tot koud en gestol. Skep vla in spuitsak met skerprandtuit van 5 mm. Plaas eerste koekiesirkel op bord, spuit vulsel in spiraal bo-op en plaas tweede sirkel bo-op. Herhaal met res van sirkels en vulsel. Sif versiersuiker oor en sit voor.