TUSSEN KONTINENTE

Afrika, die wieg van die mensdom, is diep gewortel in verafgeleë koskulture. Nog voor die koloniste hul ankers hier laat sak het, of slawehandel sy wrede keep uit die kontinent gekerf het, het die mensdom oor eeue heen in getye oor die kontinent gespoel. En met elke golf word ’n stukkie van ’n ander se erfenis nagelaat en kry die inheemse ’n saamrygeleentheid na ’n verre kultuur, waar dit eeue later dáár as erfenis toegeëien word. Van Arabiese en Midde-Oosterse invloede in die ryk koskultuur van Noord-Afrika tot Indiese, Portugese en Franse geure wat hul plek in Afrika se potte gevind het, en andersom.

Kos, soos musiek, het die vermoë om vyande te versoen. Teenpole word met tyd saggeprut, tot die senings van verset meegee om nuwe geure te verbind. Slawe uit Indonesië het die Kaap se kookkuns ’n enorme hupstoot gegee met hul speserye, liefde vir soet, sout en suur kombinasies, en gebruik van vrugte in vleisgeregte. So ook het slawe uit Afrika gesorg vir van die VSA se mees ikoniese geregte, geïnspireer deur die kos van hul eie kontinent.

Jollofrys word beskryf as Nigerië se nasionale gereg wat by bykans elke geleentheid voorgesit word. Dis ’n eenvoudige gereg van rys wat met tamatie, ui en soetrissie gekook word – soms met vleis – en word gereeld saam met egusi-sop geëet. Egusi word gemaak van gemaalde spanspekpitte en bitterblaar. Hierdie umami-ryke tamatierys uit Wes-Afrika is die voorloper van jambalaia, ’n bekende rysgereg wat in die 1920’s in die Suidelike state van Amerika gewild geword het danksy die aanpasbaarheid van die resep. Fufu het ook die sprong oor die Atlantiese Oseaan gemaak en die stapelvoedsel van Afrikane in slawerny geword. Hul “hoe-cakes” wat met meel en warm water gemaak is, het met verloop van tyd die plaatkoekies geword wat steeds die gewildste ontbyt in die VSA is. Okra, ’n groente wat aan klein murgpampoentjies herinner en ook “ladies’ fingers” genoem word, is die hoofbestanddeel in gumbo. Hierdie gereg is gewild in Frankryk, Spanje en Amerika, en bestaan uit groente gemeng met hoender, varkvleis, garnale of kreef. Swartbekboontjies is nog ’n Afrika-gewas wat as gevolg van slawerny na ander kontinente versprei het. Meelpiesangs wat gekook word, het groot byval gevind in Suid-Amerika. In die Dominikaanse Republiek, Kuba en Puerto Rico word meelpiesangs in skywe gesny, goudgeel gebraai en tussen twee borde stukkend gedruk voor dit weer gebraai word.