AFRIKA SE TOP-10
Soos gesê, is pap en vleis ’n kontinentale gunsteling, maar met 1,3 miljard mense versprei oor 54 lande is daar heelwat diversiteit.
1 Hoendertagine van Marokko: Die resep vir hoendertagine met groen olywe en gesoute suurlemoen is reeds in 1938 in die Franse kosbybel Larousse Gastronomique gepubliseer. 2 Pastilla, ook van Marokko: ’n Tradisionele duifpastei wat deesdae merendeels met hoender gemaak word. Lae papierdun deeg word om die beurt gevul met ’n spesery-en-neutmengsel en gemaalde vleis. Pastilla is soet en sout, delikaat dog vullend. 3 Piri-piri-garnale en -hoender van Mosambiek: ’n Heerlike viering van Portugese, Oosterse en Arabiese geure, met ’n lekker byt. 4 Potjiekos van Suid-Afrika: Rooivleis, seekos, hoender of groente – mits jy dit in ’n ysterpot oor die kole gaarmaak en nié roer nie, kwalifiseer dit waarskynlik as potjiekos. 5 Kapenta met sadza-pap van Zimbabwe: Twee spesies varswatervissies wat gedroog of vars geëet word, soms in ’n bredie met tamatie, ui en grondboonpoeier en voorgesit met mieliepap om die sous op te skep.
6 Chambo met nsima (stywepap) van Malawi: Die bekendste en gewildste vis uit die Malawimeer, oor die kole gebraai rég langs die meer en voorgesit met nsima of slaptjips. Wat chambo onderskei van gewone vis en tjips – of vis en pap – is ndiwo, ’n geurige sambal wat van pampoenof kassaweblare gemaak word. 7 Muamba de galinha van Angola: ’n Speserygegeurde, ryk hoenderbredie met palmolie, palmbotter, knoffel, rissies en okra. Variasies van die gereg word oral in die Kongo gevind. ’n Weergawe met makadamianeute is die nasionale gereg van Gabon.
8 Brijani van Suid-Afrika: ’n Klassieke Kaaps-Maleise gereg met lae geurige vleis, rys, lensies, speserye en fyn, gebraaide uie. 9 Birjani en pilau van Zanzibar: Soortgelyk aan ’n Kaapse brijani, word dié speserygegeurde rysgeregte ook met ’n vars tamatie-en-uieslaai (sambal) voorgesit. 10 Nyama na irio van Kenia: Hierdie stapelvoedsel van die Kikoejoestam is nou landwyd wyd in Kenia gewild. Dit bestaan uit fyngedrukte aartappel, ertjies, jies, bone, mielies en uie wat met et gebraaide, speserygegeurde de nyama (vleis) voorgesit word. ord.