Belgiese koffiewafels
(bl. 32) Ek het ’n groot liefde vir wafels vir laatontbyt. Dis soet en laat jou dag sommer spesiaal voel. Soek wafelpanne met ’n mooi vorm. Ons s’n is van Checkers. genoeg vir 6-8
375 ml (210 g) koekmeel 5 ml sout 20 ml suiker 15 ml bakpoeier 2 eiers 250 ml melk 20 ml gesmelte botter 60 ml baie sterk koffie 250 g aangesuurde room (crème fraîche) vir voorsit
KARAMELSOUS 200 g (250 ml) suiker 75 g (80 ml) botter 100 ml water 200 ml room 45 ml baie sterk koffie
Sif meel, sout, suiker en bakpoeier saam. Klits eiers, melk en gesmelte botter saam en voeg koffie by. Meng gesifte bestanddele by eiermengsel en laat rus in yskas vir 15 minute. Terwyl beslag rus, maak sous: Plaas suiker, botter en water in middelslagpot. Bring tot kookpunt en roer oor lae hitte met houtlepel tot suiker opgelos het. Verhoog hitte en kook tot goue karamel vorm, so 8-10 minute. Voeg room en koffie by. Meng en bring weer tot kookpunt, verwyder van hitte en hou eenkant. Verhit ’n wafelpan. Skep van die beslag in middel van pan. Braai tot bros en gaar. Hou gaar wafels warm in louwarm oond terwyl jy die res braai. Pak warm wafels op dienbord. Sit voor met crème fraîche en karamelsous.