Patatkerrie

(bl. 33) Jy gaan dié gereg voorsit en niemand gaan eens wonder waar die vleis is nie. Glo my, dis hemels! genoeg vir 6

45 ml olyfolie 1 ui, fyngekap 30 ml vinkelsaad 30 ml rissievlokkies 45 ml gerookte masala 20 ml borrie 2 lourierblare 2 x 410 g-blikke klappermelk 1 x 410 g-blik gekapte tamaties 1 hand vol koljander, fyngekap sout en varsgemaalde swartpeper 4 groot patats, skoon geskrop in water ongegeurde veganistiese jogurt vir voorsit (dié van klapperroom is die beste)

Verhit olyfolie in ’n middelslagpot tot warm. Voeg ui, vinkelsaad en rissievlokkies by. Roerbraai 5 minute of tot uie begin verbruin – as dit lyk of die speserye begin brand, gooi ’n bietjie water by. Voeg res van speserye vir die kerriesous by en roerbraai vir nog 5 minute of tot mengsel geurig is. Gooi klappermelk en tamaties by. Meng deur. Verlaag hitte en laat stadig prut vir 20-25 minute of tot dik, romerige sous vorm. Roer vars koljander deur. Geur goed met sout en peper. Verhit oond tot 180 °C. Sny patats in skywe van so 1,5 cm dik. Pak in enkellaag in oondroosterbak. Gooi kerriesous oor. Bak vir 25-30 minute of tot patats gaar is en begin verbruin. Sit voor met veganistiese jogurt.