Kookklas 2: Onthoupoedings
Niks maak jou sintuie so wakker en troos jou teen die winterkou soos die soet geur van ’n warm winterpoeding wat in die kombuis hang nie. Die vreugde en genot daarvan is in die eenvoud; niks fênsie nie, maar o, so lekker!
Kom ons praat poedinglekkerte
KATRYN KRUGER internasionale model en sameroeper van Koffie met Katryn
As ek dink aan winterpoeding, is dit aan my ma se souskluitjies (of “sponskluitjies”). Sy het dit met regte botter en báie kaneelsuiker gemaak. Ná ’n Sondagmiddagete van tradisionele kookkos het ons gesin dit geëet met ’n groot pot tee daarby en saam om die tafel gekuier en gelag terwyl die Kaapse weer buite woed.
KAREN ZOID musikant en aanbieder
van Republiek van Zoid Afrika
Malvapoeding laat my dink aan my ouma Elsa, wat altyd kaart en Scrabble saam met my gespeel het. Sy was nie noodwendig ’n goeie kok nie, maar malvapoeding was haar spesialiteit. Ek en sy het altyd tot laat in die aand wakker gebly en swart-en-wit Al Debbo-flieks gekyk terwyl ons tee drink en malvapoeding eet. Dis tot vandag toe my gunstelingnagereg.
JOLENE MARTIN Beatrice in
Arendsvlei
My gunsteling is Kaaps-Maleise boeber, ’n soort sagopoeding wat van vermicelli gemaak word. Dit is seker dié ongelooflikste geurherinnering uit my kinderjare. Toe ek jonk was, het my loopbaan my van die Kaap na Johannesburg geneem en ek het gehunker na die Kaap as dié poeding in die ronde was. Die kombinasie van kardemom, kaneel, klapper, amandel en rooswater is soos balsem vir my gemoed. Tot vandag toe laat dit my droom!
MARCIEL HOPKINS model en
Boer soek ’n vrou- aanbieder
Ek dink aan malvapoeding en vla as ek winterpoeding uit my kinderdae herroep. Ná ete by die tafel kon ons op die sagte banke voor die vuur gaan opkrul met ’n bakkie malvapoeding en vla wat jou hande warm hou en jou hart volmaak. Dit bring ’n gevoel van gesinsliefde, knusheid en veiligheid by my op.
ANNELISA WEILAND Kate in
Suidooster
Hoewel ek nie eintlik ’n “poedingmens” is nie, dink ek terug aan die pampoenkoekies wat my ouma gemaak en vir ons as nagereg voorgesit het. Eendag het sy weer ’n baksel gemaak en ek het my vergryp, so erg dat ek lank daarna nog ’n naar kol op my maag gekry het as iemand net die woord “pampoenkoekie” noem. Matigheid was nog nooit my sterk punt nie!
LARÉ BIRK Alice in Binnelanders
Ek dink aan Lambertsbaai. Koud. Nat. Mistig. Met die see se aroma in die lug, gemeng met gasstoof en kaneel. My ouma se lag en my ma se sagte stem. En ’n bakkie met warm melkkos wat als laat stop vir ’n onvergeetlike oomblik.