Mocktails met vrugte
Van New York tot Londen – alkoholvrye drankies is gróót nuus. Soektogte na woorde soos ‘mocktail’ en ‘non-alcoholic’ skiet aanlyn die hoogte in, volgens Google Trends. Ja, ook hier in SA is dit gewild. Nie net is dit gesonder nie, maar dis ook ’n gesofistikeerde keuse
Daar is (nog) ’n gapende kloof in ons samelewing. Fuifdrinkery en alkohol-afhanklikheid is groter as ooit. Daarteenoor drink ’n groeiende aantal mense minder, wel, soms. Aan-en-af-drinkers kan alkoholvrye geleenthede op hul kalender aanteken: Soos Daybreaker (daybreaker.com), ’n vroegoggenddansgemeenskap van meer as ’n halfmiljoen mense in sowat 44 stede wêreldwyd. En Sober Grid (sobergrid.com), ’n sosiale app met sowat 108 000 gebruikers as jy nugter wil bly. Ander mense gebruik mindfulness, ’n fokus op die hier en nou. Dit help swaar drinkers inderdaad om die elmboog minder te lig, volgens ’n studie in die International Journal of Neuropsychopharmacology. En te oordeel na verlede jaar se geesdriftige meelopers, gaan sowat 5 miljoen mense wêreldwyd binnekort 2021 afskop met Droë Januarie – ’n maand waar die drankkabinet toebly. >
< Dis ’n tendens oral: Sowat 33% van mense wêreldwyd wil minder kappe maak, om redes wat wissel van gesondheid, tot seksuele berou en verleentheid, volgens die Global Drugpeiling met sowat 72 000 respondente. Suid-Afrikaners kan nog ’n rede hierby voeg, buiten die drankverbod tydens die inperkingstyd: Die regering beplan om alkohol geheel en al taboe te maak vir mense wat bestuur. Tans mag jy slegs 0,05 g alkohol per 100 ml bloed in jou liggaam hê wanneer jy agter die stuurwiel inskuif. Iemand wat 68 kg weeg, kan derhalwe
10 ml (suiwer) alkohol per uur inneem.
Dié ingesteldheid om minder te wil drink wen veld, veral onder die jonger generasies. Sowat 72% van millenniërs sê hulle keur dit nie goed dat mense van 18 en ouer feitlik elke dag een of twee drankies drink nie, volgens navorsing deur Goldman Sachs Global Investment (goldmansachs.com). Maar minstens in Amerika doen hulle nie wat hulle predik nie en dop ook maar lekker, wys navorsing deur die marknavorser Nielsen.
Dis maklik om te sê “te veel alkohol is sleg vir jou”. Daar is immers die lang lys gesondheidsprobleme waarvoor dit die blaam moet dra, van jou sat lewer tot motorongelukke. Meer ingewikkeld is die vraag: Is geen alkohol beter vir jou gesondheid as net ’n bietjie?
Die Global Burden of Diseases-studie in die joernaal The Lancet het die data van honderde studies en ander inligting (waaronder verkope van alkohol, die drink van tuisgebroude alkohol, selfs die geskatte inname van toeriste) van 1990 tot 2016 in 195 lande ondersoek. En ontleed hoe groot die impak van alkohol op jou gesondheid werklik is, insluitend dood en ongeskiktheid weens motorongelukke, aansteeklike siektes, kanker en hartvatsiektes. Die bevinding laat ’n mens nogal dink: Daarvolgens is dit die beste vir jou algehele gesondheid as jy glad nie drink nie. Die definisie van “’n drankie” in die studie was 10 g alkohol.
Ander bevindings van die studie:
Alkohol was in 2016 die sewende grootste oorsaak van dood en ongeskiktheid wêreldwyd; sowat 2% van vroulike en 7% van manlike sterftes is as alkoholverwant beskou.
In die ouderdomsgroep 15-49 was alkohol die vernaamste risikofaktor vir dood en ongeskiktheid wêreldwyd. Tuberkulose, padongelukke en selfbesering was die grootste oorsake (die risiko vir elk van dié toestande is hoër as jy drink).
By ouer volwassenes was kankersoorte verwant aan alkoholgebruik die hoofoorsaak van dood.
Gesondheidsrisiko’s styg oor die algemeen soos wat alkoholgebruik toeneem. Ligte alkoholgebruik (minder as 1 drankie per dag) het ’n effense beskermende effek op hartsiekte en diabetes by sommige groepe.
In ’n ontleding op die Harvard Mediese Skool se webtuiste (health.harvard.edu) word gesê die Global Burden of Diseases-studie is groot, wat help om tendense te identifiseer. Belangrike individuele faktore kan egter só misgekyk word, want dit is waar dat alkohol sommige mense méér skade aandoen, ander minder. Die wegneemboodskap is wel: As jy nie eintlik van alkohol hou nie, is daar geen “medisinale” redes om nou te begin drink nie. Al het ons almal êrens in ons verlede iemand in die ouer generasie wat in ’n knertsie voor slaaptyd se helende krag geglo het! BYKOMENDE BRONNE: time.com, netwerk24.com