12 dinge wat jy nie van mossels en oesters geweet het nie
1 VEGANISTIES
Mossels en oesters word as veganisties
beskou om twee redes: Dit het nie ’n definitiewe ma of pa nie en ook nie ’n definitiewe senuweestelsel nie. Maar
dis ’n debat wat aanhou!
2 BERGING
Mossels en oesters is geneig om uit te droog in die yskas. Gooi daarom ’n nat
doek oor om te keer dat dit gebeur.
3
GEWILD IN DIE OOSTE
Die smaakprofiel van die oesters en mossels wat by Saldanha gekweek word, is baie gewild in veral Oosterse lande. Die ietwat soet geur in die planktonspesies wat hier voorkom, word oorgedra na die mossels
en oesters.
4 SPAANSE MOSSEL
Die Spaanse mossel wat ook by Saldanha voorkom, het hom al op
vyf kontinente gevestig.
5
O, SUSHI!
Rou mossels in sushi is gewild in lande
in Oos-Europa en in die Ooste.
6 OOP OF TOE
Mossels kan oop of toe wees. As dit oop is, beteken dit hy is besig om asem te haal; toe beteken dit wil nie gepla word nie of is besig om homself te beskerm. ’n Oester wat
oop is, is dood.
7
DOEN DIE TOETS
Om te toets of die mossel wel nog lewe indien hy oop is, tik aan die skulp. As hy toemaak, weet jy hy is nog lewend.
8 BINNELANDSE MARK
Die Suid-Afrikaanse mark verbruik sowat 1 500 ton mossels per jaar terwyl die plaaslike bedryf tans 5 000 ton produseer. Die res van die mossels
word uitgevoer.
9 VOLHOUBAARHEID
Daar is nagenoeg 8,5 miljard mense op aarde en nie naastenby genoeg
natuurlike bronne om al hierdie mense kos te gee nie. In die 1950’s was daar 50 tot 60 hektaar grond beskikbaar per persoon, maar weens die bevolkingsontploffing is dit tans minder as 1 hektaar. Dieselfde het met die see gebeur. Die see kan 90 miljoen ton kos per jaar voorsien. Tans gebruik die mensdom meer as 180 miljoen ton. Dis hierdie gaping tussen vraag en
aanbod wat seeboerdery vul.
10 WONDERKOS
Mossels is hoog in omega 3- en omega 6-vetsure, wat onder meer antiinflammatories is en goed vir jou hart.
11 TOTSIENS, KOOLSTOFVOETSPOOR
Een ton mossels of oesters in die water
bind genoeg koolstofdioksied (CO2) vir een persoon per jaar. Dit absorbeer dus een mens se koolstofvoetspoor per jaar. Die sowat 2 200 ton mossels wat by die Blue Ocean Mussels-plaas by Saldanha geproduseer word, absorbeer die hele Langebaan se jaarlikse
koolstofvoetspoor.
12 PLAAS VS WILD
Mossels waarmee geboer word, groei baie vinniger tot markgrootte as wilde mossels. Die vleis van plaasmossels is ook gewoonlik soeter en sappiger.
Wilde mossels is dikwels in hoëenergie-omgewings waar die golwe teen die rotse slaan. Die wilde mossel moet aan die rots klou vir sy behoud en skei daarom meer van sy baard af om homself beter vas te heg. Die skulp van die wilde mossel is ook tipies dikker as ’n plaasmossel s’n
en sy vleis minder.