Alkoholvry nie-alkoholies de-alkoholiseerd
Ken die verskil
As jy wyn koop vir iemand wat nie drink nie vanweë swangerskap of om ander persoonlike redes, maak seker jy ken die verskil tussen die nie-alkoholiese soorte.
Alkoholvry, of 0% alkohol
Druiwe wat nooit gefermenteer het nie en jou beste keuse as jy twyfel. (Hoewel dit debatteerbaar is. In Duitsland het ’n analise tot 0,77 g/liter etanol [alkohol] in lemoen-, appel- en druiwesap gevind. Jare gelede was daar plaaslik ’n herrie toe vrugtesappe wat lukraak getoets is, ook beduidende hoeveelhede etanol bevat het. Vrugtesappe met ’n hoë suikerinhoud kan soms voor pasteurisasie fermenteer.)
Nie-alkoholiese wyn, of minder as 0,05% alkohol
In teorie is dit alkoholvry, maar dis nie noodwendig die geval nie. Dit word op presies dieselfde manier as alkoholiese wyn gemaak. Wanneer fermentasie voltooi is, word die alkohol verwyder tot dit minder as 0,05% is.
De-alkoholiseerde wyn
(de-alcoholised), of minder as 0,5% alkohol
Die naaste aan die ware Jakob. Alkohol speel ’n belangrike rol in die geurprofiel en balans van wyn. Verwyder die alkohol en die balans word versteur. Nou is daar deesdae tegnieke om alkohol te verwyder wat die wyn se aromas en mondgevoel baie min verander. Ook dit word nes alkoholiese wyn gemaak en die alkohol ná fermentasie verwyder tot dit minder as 0,5% is. Die karakter van die wyn word dus behou.
Robertson Winery het die volgende de-alkoholiseerde produkte op die mark:
Droë en soet wit vonkelwyn Droë en soet rosé-vonkelwyn