Ontmoet die kenners
Klas1
JOU MES
KENNER JERALD BLABER
Hy slyp reeds 25 jaar sy kundigheid om messe met die hand te maak en doen dit voltyds uit sy ateljee op Porterville in die Wes-Kaap. Dié liefde het in sy kinderjare by ’n knipmes begin en vandag spesialiseer hy in die maak van kombuis- en ander gebruiksmesse uit herwonne materiaal, soos ou wynvate vir hewwe en hoë-gehaltekoolstoflemme.
Dié behendige kok glo drie goeie messe is al wat jy nodig het. Hy neem die mistiek uit die kuiltjies op lemme, verduidelik hoe ’n Japanse santokoemes van ’n sjefsmes verskil, en vra of ’n skottelgoedwasser jou lieflingmes se vriend of vyand is.
Klas2
EIERS
KENNER CELIA MYBURGH
Celia van Homegrown Free-Range Eggs op Stellenbosch het met plaaseiers begin boer nadat ’n verdwaalde lêhennetjie, Mama Vuvuzela, op haar plaaswerf aangeloop gekom het. Nou verskaf sy eiers aan die kieskeurigste sjefs. Gelukkiger kan haar hoenders nie wees nie: Bedags skrop hulle in die beddings, saans skarrel hulle self terug hok toe om in vrede hul eiertjie te lê.
Of jy wil weet hoe plaaseiers eties en smaakgewys van hokeiers verskil, of eiers met bruin doppe beter smaak as wittes (soos koningin Elizabeth glo), hoekom party eiergele helder is en ander bleker, of wil toets of ’n eier vars is, Celia ken al die antwoorde.
Klas3
AFTREKSELS EN SOUSE KENNER CARMEN MULLER
Dié sjef het in 2015 die Eat Out Rising Star-toekenning ontvang en haar aansien as kreatief, energiek en tegnies uitmuntend bevestig. Sy het haarself al bewys by Terroir, Rupert & Rothschild, Towerbosch, Viande en Simonsig. Die maak van aftreksels is haar gunstelingkombuisritueel en souse met ’n titsel saffraan hier en ’n spatsel sjerrie daar haar superkrag.
Vergeet van leermeesters wat perfeksie en kompleksiteit soek, want Carmen glo selfs die mees basiese aftreksel en eenvoudigste sous verhef ’n bord kos tot die volgende vlak. Sy benut elke deel van die plant of dier en maak daarmee die lekkerste kos.