Kom ons praat yskaspoeding
WILLEM POOL Boer soek ’n vrou 2019
Toe ek ’n kind was, het my ma altyd ’n pynappelpoeding gemaak wat sy in die yskas gesit het. Ek en my susters het dit die “pynappellekkerny” of “pynappelpoeding” genoem, want dit het eintlik nie ’n naam gehad nie. Saterdagoggende sou my ma dit aanmekaar geslaan het – die Ideal-melk lekker koud gemaak, sulke gekapte blokkies pynappel, en natuurlik het Tennis-beskuitjies die basis gevorm. Daar was ’n paar geheime bestanddele ook! Maar dit was so lekker en sy het dit met geklopte room bo-op voorgesit.
RÉAN CLASEN Boer soek ’n vrou 2018
Ek het goeie herinneringe van yskaspoedings. Só onthou ek hoe my ma altyd die heerlikste flambé-karamelpoedings gemaak het, waarvan ek as kind nie genoeg kon kry nie. En by die kerkbasaars op Groblershoop was die poedingtafel ’n fees van yskaspoedings – in al wat ’n kleur is, want jy het ’n skeppie van alles in jou bakkie gesit. Natuurlik eet jy met Kersfees amper eerder die trifle as die ander kosse!
TOANETTE ELS Boer soek ’n vrou 2018
As kind het ons dikwels Sondae gaan uiteet by ’n plek waar daar altyd trifle as nagereg was. En ons het eintlik spesifiek daarvoor gegaan, want dit was ’n groot hoogtepunt vir ons – veral omdat ons gesin nie juis self groot was daarop om nagereg by die huis te maak nie. As ek vandag aan trifle dink, dan onthou ek daardie Sondae toe ek, my pa, my ma en my broer as gesin saam gaan eet het.
HENTIE KRUGER Boer soek ’n vrou 2019
Yskaspoeding laat my altyd dadelik aan my oorlede ma dink. Een van die lekkerste herinneringe wat by my opkom, is dat sy altyd spesiaal vir my koejaweltert gemaak het as ek by haar gaan kuier het of as sy kom kuier het. Die kors word gemaak van Rice Krispies en gesmelte marshmallow, dik gesmeer met gekookte kondensmelk, gevolg deur ’n laag ingelegde koejawels, met styfgeklopte room bo-op. Dit is my absolute gunsteling; ek sal Hantie moet leer hoe om dit te maak!
GRAHAM LOMBARD Boer soek ’n vrou 2019
My ma se ma, ouma Martie, kom altyd plaas toe vir Kersfees en daag dan met ’n klomp bestanddele net vir die trifle op. As kind onthou ek sy was spesifiek agter die vars room op die plaas aan – haar “geheime” bestanddeel, het sy gesê, en daar was ’n baie spesifieke glasbak wat sy gebruik het. Haar grootste vrees was dat die jellie ’n “skil” op sou kry, so sy het die jellie goed dopgehou. Sy het boonop haar trifle “Graham se trifle” genoem, so ek was gek daaroor.
DAMIAN ENGELBRECHT Boer soek ’n vrou 2019
As ek hoor yskaspoeding, dink ek aan trifle, wat seker eintlik ons nommereenpoeding was! Dit roep herinneringe van my kinderjare op toe ek en my ma deel was van ’n Christelike sanggroep wat naweke by verskillende kerke reg oor Suid-Afrika opgetree het. En by omtrent elke gemeente is daar altyd trifle saam met die etes bedien – so ek het al honderde tannies se trifle geëet! Maar ek het nog nooit daarvoor moeg geraak nie.