Sjokolade-en-anys-brioche

(bl. 25) Brioche is ’n soet brood met baie botter in en perfek vir ontbyt. Dink daaraan as ’n croissant wat sy lyf brood hou. genoeg vir 1 brood

500 g (890 ml) koekmeel 50 g (60 ml) strooisuiker 10 g-sakkie kitsgis

10 ml sout

10 ml anyssaad

6 eiers 250 g ongesoute botter, in klein blokkies gesny

100 g donkersjokolade, grofgekap 1 eier, liggies geklits

SJOKOLADESOUS

125 ml room

100 g donkersjokolade, gekap

Plaas meel, strooisuiker, gis, sout, anys en eiers in bak van elektriese menger. Gebruik mengspaan (K-Beater) en meng sowat 8 minute by mediumspoed tot stywe deeg vorm. Voeg botter bietjies-bietjies by tot alles goed gemeng is. Die deeg sal ’n gladde voorkoms hê. Plaas deeg in bak wat met olie gesmeer is. Bedek bak met kleefplastiek en laat rus oornag in yskas. Keer deeg op meelbestrooide werkvlak uit en verdeel in twee. Druk deeg plat met jou hande tot sowat 1 cm dik. Sprinkel gekapte sjokolade oor een helfte. Plaas ander helfte deeg bo-op en rol stewig op. Plaas in broodpan van 30 x 10 cm wat met kleefwerende kossproei gespuit is. Laat rys op warm plek tot dubbel die volume, sowat 60-90 minute. Verhit oond tot 180 °C wanneer die deeg so halfpad gerys het. Verf uitgerysde deeg met geklitste eier en bak vir 25-30 minute of tot goudbruin en gaar. Verhit room tot kookpunt en gooi oor gekapte sjokolade. Roer tot gladde mengsel. Gooi oor brood en sit voor.