Kersfeesvarknek
(bl. 57) Soms is ’n gerookte varkboud of ham (gammon) net te groot vir ’n kleiner gesin se Kerstafel. Dan maak ek graag varknek volgens dieselfde beginsel gaar en glaseer dit. genoeg vir 6-8 150 g spinasie, fyngekap 6 salieblare, fyngekap 2 knoffelhuisies, fyngekap sout en varsgemaalde swartpeper 2,5 kg ontbeende varknek 30 repies gerookte strepiespek 350 ml nartjie- of lemoensap 60 ml heuning
4 naeltjies
400 g vars aspersies soetmosterd vir voorsit
Meng spinasie, salie en knoffel. Geur goed met sout en peper. Plaas varknek op skoon werkvlak en sny met kort bewegings horisontaal deur die vleis – albei kante moet min of meer ewe dik wees. Stop voordat jy heeltemal deur die nek sny en vou die vleis oop soos ’n skoenlapper wat sy vlerke sprei (jy butterfly die vleis, soos die Engelse sê). Skep spinasiemengsel op die vleis en rol stewig op. Draai toe in 30 repies gerookte strepiespek. Vou hele rol toe in kleefplastiek en dan in foelie. Plaas genoeg water in ’n pot om rol te bedek en bring tot kookpunt voordat jy rol in die pot sit. (Vul met kookwater aan soos die water wegkook.) Kook vir 30 minute vir elke 500 g, maar trek 30 minute af van die kooktyd vir oondbraai. Ons snit het 2 uur gekook en 30 minute gebraai. Verhit oond tot 180 °C. Meng sap, heuning en naeltjies. Haal rol uit water, verwyder foelie en kleefplastiek en plaas in oondroosterpan. Skep sitrussous oor en plaas in warm oond. Braai stadig tot goudbruin en skep nou en dan van die pansous oor die vleis. Sodra vark bruin is, plaas aspersies in oondpan en braai vir nog sowat 10 minute of tot aspersies amper sag is, maar nie pap nie. Sit vleis en aspersies warm voor met soetmosterd van jou keuse.