Suurlemoen-tiramisu
Tradisioneel word hierdie nagereg met koffie gemaak, maar vir ons warm dae hier in SA gee ek dit graag ’n suurlemoengeur met Italiaanse Limoncello.
genoeg vir 6-8
SUURLEMOENSMEER ■ 250 ml vars suurlemoensap ■ 4 eiers ■ 2 eiergele ■ 200 g (250 ml) suiker ■ 50 ml botter VULSEL ■ 6 eiergele ■ 100 g (125 ml) strooisuiker ■ 10 ml vanieljegeursel ■ 100 ml Limoncello (suurlemoenlikeur) ■ 2 x 250 g-bakkies mascarpone by kamertemperatuur ■ 250 ml room ■ 50 ml suurlemoensap ■ 100 ml koue water ■ 30 vingerkoekies (Boudoir) ■ 50 ml versiersuiker vir oorsif
1 Maak eers die suurlemoensmeer: Plaas suurlemoensap, eiers, eiergele en suiker in glasmengbak wat oor ’n pot kwartvol water sal pas, sonder dat die bak aan die water raak. Verhit pot met water oor matige hitte. Plaas dan bak op pot en begin dadelik klits met ’n draadklitser. Klits aanhoudend totdat mengsel gaar en dik word, sowat 8-10 minute. Sodra mengsel gaar is, gooi dit in skoon, koue bak weg van hitte af en roer botter by tot gemeng. Laat afkoel.
2 Maak nou res van vulsel: Maak weer ’n dubbelkoker soos in stap 1 en plaas eiergele, strooisuiker, vanieljegeursel en helfte van likeur saam in glasbak. Verhit pot met water tot kookpunt en verlaag hitte tot stadige prut. Plaas bak op pot en klits mengsel oor warm water met elektriese klitser tot lig en skuimerig, sowat 8-10 minute.
3 Verwyder van hitte en hou aan klits tot mengsel koud is. Terwyl klitser loop, skep mascarpone lepel vir lepel by eiermengsel en klits tot glad. Hou eenkant. Klits room met skoon klitser tot sagte punte vorm en vou by mascarponemengsel in.
4 Meng suurlemoensap, water en res van likeur. Doop koekies vinnig in suurlemoenstroop en pak ’n laag in ’n bak met ’n deursnee van 30 cm en so 3 cm diep. Skep helfte van koue suurlemoensmeer bo-op, gevolg deur helfte van mascarponemengsel. Smeer gelyk. Pak nog ’n laag koekies wat in suurlemoenstroop gedoop is bo-op. Smeer res van suurlemoensmeer oor en skep orige vulsel in spuitsak met ’n 1 cm-skerprandtuit. Spuit klein klontjies vulsel bo-op smeer tot die bak vol is. Plaas in yskas vir 4 uur.