Wynland-pizza bianca met druiwe, feta en tiemie
(bl. 137) Die eerste keer dat ek druiwe op ’n pizza geëet het, was by my susters e huis op die Lourensfordwynlandgoed op Somerset-Wes. Hulle het ’n oulike klein pizzaoond buite, perfek vir al fresco-feeste. Sy het rooi druiwe gebruik wat in verjuice geweek is, en ricotta, roosmaryn en ’n paar luukse dennepitte bygevoeg. Hier is my vereenvoudigde weergawe met wit druiwe, feta en tiemie. maak 2 groot of 3 middelslagpizzas
■ 500 g brooddeeg
■ ± 250 ml (1 koppie) wit druiwekorrels, gehalveer
■ 2 wiele fetakaas, gekrummel
■ 2-3 takkies vars tiemie soutvlokkies en varsgemaalde swartpeper
■ 1 terracottateël van sowat 40 x 40 cm
Plaas die terracottateël in die oond en verhit tot 230 °C. Rol die deeg so dun as moontlik uit in sirkels – sowat 30 cm in deursnee vir groot of 23 cm vir middelslagpizzas. Plaas elke deegsirkel op ’n vel bakpapier op ’n omgekeerde bakplaat, om te keer dat ’n “lip” vorm wanneer jy die pizza in die oond sit. Pak druiwe, gekrummelde feta en tiemieblare bo-op en gebruik dan die omgekeerde bakplaat om die pizza met bakpapier en al versigtig op die verhitte terracottateël te laat gly. Bak vir 7-9 minute tot goudkleurig en borrelend. Haal die pizza uit die oond deur die bakpapier aan die een hoek tot op die bakplaat te trek, en skuif dan die pizza van die bakpapier af op ’n houtplank. Geur met sout en peper en sit dadelik voor.