LEKKER KAMPPLEKKE

Ons het gaan aanklop by travelstart.co.za vir hul lys van beste plekke in SA om te kamp

FIDDLERS CREEK Oranjerivier, Noord-Kaap

Wat jy kan verwag: Slaan kamp op aan die oewer van die Oranjerivier vir ’n wildernis-wegbreek mét geriewe soos ’n onderdakkombuis, opwasbakke met lopende water, krag en ’n ingeboude braai. Die gewilde vlotvaart-ekspedisies wissel van ’n halfdag tot 5 dae. Besprekings: 027 761 8953, info@bushwhacked.co.za

BRUINTJIESKRAAL Baviaanskloof, Wes- en Oos-Kaap

Wat jy kan verwag: Dié kampterrein aan die oewer van die Grootrivier is die perfekte basis vir verkenning van die skilderagtige kloof. Elke kampeerplek het ’n spoeltoilet, stort en braaigeriewe. Warm water is beskikbaar. Veral geskik vir paartjies en gesinne.

Besprekings: 084 515 0993, info@bruintjieskraal.co.za

MOTSWEDI Mokala Nasionale Park, Noord-Kaap

Wat jy kan verwag: Die luukse kampterrein het 6 kampeerplekke, natuurlik afgeskort deur kameeldoringbome en elk met sy eie ablusiegeriewe, songeiser, kombuisdeel en opwasarea. Ideaal vir diegene wat “glamping” geniet en die begroting daarvoor het. Besprekings: 012 428 9111, 082 233 9111, reservations@sanparks.org

BEAVERLAC Cederberg, Wes-Kaap

Wat jy kan verwag: Hierdie troeteldiervriendelike kampterrein met sy rotspoele en watervalle is perfek vir ’n naweekwegbreek uit Kaapstad. Dit bied fantastiese geleenthede vir staptogte en bergfietsritte, met verskeie grotte met rotstekeninge om te verken. Besprekings: 022 931 2945, info@beaverlac.co.za

BUCCANEERS Cintsa, Wildekus Wat jy kan verwag: Die kampterrein tussen reuse-duine en die strandmeer het ’n gemeenskaplike kombuis, ’n restaurant, kroeg, swembad en kano’s vir sonsondergangvaarte. Jy kan ook perdry op die strand, bergfiets ry, leer branderry of ’n Xhosa-stat besoek. Besprekings: 043 734 3012, buccaneers@cintsa.com

TSENDZE Noordelike Kruger Nasionale Park

Wat jy kan verwag: Net 7 km vanaf die Mopani-ruskamp in die Wildtuin is dié ongekunstelde kampterrein met 30 kampeerplekke uitgelê in twee sirkels rondom uitstekende ablusie- en kombuisgeriewe. Warm water en krag word voorsien deur sonkrag en gas. Daar is volop voël- en dierelewe, en leeus en luiperds is ook al gewaar. Besprekings: 013 735 6535/6

STONEY RIDGE Colenso, KZN Wat jy kan verwag: As jy graag die skilderagtige Middelland wil besoek, dan is hierdie kampterrein ideaal. Dit is geleë in ’n skaduryke omgewing op ’n private wildsplaas aan die oewer van die Bloukransrivier. Die kampterrein spog met goeie ablusiegeriewe, volop natuurlewe, 4x4-roetes en ’n restaurant. Veral geskik vir gesinne. Besprekings: 036 354 7012,

073 697 5108, info@stoneyridge.co.za

ALBERT FALLS Pietermaritzburg Wat jy kan verwag: Die kampterrein is 24 km buite die stad in die Albert Falls-reservaat van 3 000 ha geleë. Die ablusiegeriewe word goed onderhou en daar is warm water, elektriese lig en kragpunte. Visvang en watersport op die dam is deel van die attraksie. Besprekings: 033 569 1202, albert.falls@msinsi.co.za

STORMSRIVIERMOND,

Tsitsikamma Nasionale Park, Oos-Kaap

Wat jy kan verwag: Kampeerders het toegang tot 80 km se dramatiese kuslyn asook elke nodige gerief vir ’n aangename kampervaring. Daar is ’n gemeenskaplike ablusieblok, kitswassery, kombuisgeriewe, ’n restaurant en winkel. Geskik vir gesinne.

Besprekings: 042 281 1607, grace.valela@sanparks.org

GLEN REENEN Golden Gate Hoogland Nasionale Park, Vrystaat

Wat jy kan verwag: Dié ruskamp langs ’n stroom tussen bome het ablusieen braaigeriewe en kragpunte by sommige staanplekke. Dis ’n tuiste vir ’n verskeidenheid wilde diere en voëls met stap en bergfietsry gewilde aktiwiteite. Besprekings: 058 255 0909/1000, goldengate@sanparks.org

SOETWATEROORD & MEDUSA-WOONWAPARK

Kommetjie, Wes-Kaap

Wat jy kan verwag: Die lieflike klein oord is geleë in die suidelike deel van die Skiereiland op ’n onontwikkelde kusterras wat bewaar word vir sy biodiversiteit. Kies tussen staanplekke met of sonder krag. Swem, visvang en kreefduik is gewilde tydverdrywe.

Besprekings: 021 783 4146, resort.bookings@capetown.gov.za

SECRET FALLS Tulbagh

Wat jy kan verwag: Die kampterrein aan die voetheuwels van die Groot Winterhoekberge is slegs toeganklik vir viertrekvoertuie en het plek vir net 7 tente. Ideaal vir paartjies wat wil wegbreek uit die stadsgewoel. Besprekings: 082 393 4704, marcnadia@mweb.co.za