Vormingsjare
Met ’n rits kitsprodukte en nuwe toerusting kon die moderne huisvrou se verbeelding vorm kry. Letterlik. Die 1960’s was ’n era van gestolde kos – van voorgereg tot nagereg het ’n gelatien-inspuiting gekry. Tuna-, vleis- en noedelslaai is in allerlei vorms gestol en voorgesit met ’n doopsous van mayonnaise en soppoeier, fyngekapte blaarslaai en skyfies olywe. Pynappel-onderstebokoek was hoogmode, so ook gebakte alaskapoeding. Daar is gepeusel aan ’n verskeidenheid gerolde kos, van kersies in spek tot ham en geblikte aspersierolletjies. Franse treffers soos hoender à la king en bief bourguignon is nageaap met behulp van blikkies sop en Bisto. Maar nou praat ek van die fênsie kos vir spesiale tye. Familiemaaltye het staatgemaak op boeliebief, geblikte spaghetti, Weense worsies en ’n groeiende verskeidenheid bevrore en geblikte groente en vrugte.
Volgens ’n webwerf wat die topgereg vir elke jaar aanwys, was spaghetti bolognese dié gereg in 1970, my geboortejaar. En ek’s steeds mal daaroor. Ek sou nie my ma as ’n koningin van Crimplene Cuisine beskryf nie – ons het byvoorbeeld nie Aromat in die huis gehad nie – maar daar was ’n ry soppoeiers so lank soos my arm in haar spens en die Bisto en Maizena was altyd binne reikafstand.
Die SARIE van Augustus 1977 omskryf dit mooi:
“As jy ’n ervare kok is, sal jy nou al die waarde van ’n paar blikkies en pakkies in die kas ken. As jy jonk en onervare is, sal jy gou leer dat hulle dikwels ’n huisvrou se redding is. Ons koop blikkies en pakkies darem nie net vir noodgevalle nie, maar dikwels ook vir spesiale geregte.” Waarop ’n paar erg spesiale geregte volg, soos die kerriehoenderslaai wat in lemmetjiejellie gestol word, Weense tertjies met gekoopte deeg en Weense worsies, en ’n vrugteslaairing van lemoenjellie en mayonnaise, gegarneer met fyngekapte slaaiblare en pietersielie. Hierdie “slaai” klink nou soos die ongemaklike liefdeskind van oorskiet-basaarkoekstruif en die slaaiflentertjies wat uit jou hamburger val terwyl jy dit eet . . . maar in 1977 was dit so nouvelle soos kan wees.