Brood met kaiings
(bl. 54) Ons het geweet dit gaan goed as my ouma ons met kaiings, botter en vuurwarm brood bederf het. Hier is my ode aan dié hartskos. genoeg vir 1 brood
450 g lamsvet, in blokkies gesny 500 g (890 ml) koekmeel
10 g kitsgis
10 g sout
45 ml heuning
45 ml olyfolie
250 ml jogurt
100 ml louwarm water
Plaas vet in groot kastrol en verhit oor matige hitte tot vet begin braai. Verhoog hitte en braai vir 10-15 minute of tot al die vet uitgebraai het en die blokkies vet goudbruin en bros raak. Gooi deur ’n sif en hou kaiings eenkant. Plaas koekmeel in ’n hoop op jou werkvlak en maak ’n holte in die middel. Gooi gis, sout, heuning, olie, jogurt en water in holte. Werk met jou vingerpunte in tot ’n redelik stywe deeg vorm. Knie 5-8 minute of tot glad en elasties. Plaas in skoon bak wat liggies met olie gesmeer is, bedek met kleefplastiek en laat 30-40 minute op ’n warm plek rys tot dubbel die volume. Keer uit, druk plat en strooi helfte van kaiings oor eerste derde van deeg. Vou skoon deeg terug oor kaiings, strooi res van kaiings oor middelste derde en vou toe met laaste stuk deeg. Vorm deeg in bal en plaas in ’n broodmandjie wat met meel besprinkel is. Laat sowat 20 minute op warm plek rys tot dubbel die volume. Verhit oond intussen tot 200 °C. Keer gerysde deeg uit op ’n bakplaat wat goed met kleefwerende kossproei gespuit is, sny met ’n skerp mes drie kepe in oppervlak en bak 25-30 minute of tot brood goudbruin en gaar is. Laat op ’n draadrak afkoel en sit voor met botter.