Karamelbrood
(bl. 107) Die Amerikaners noem dit “monkey bread”. Dis klein stukkies deeg wat in karamel gebak word en baie lekker as alternatief vir koek. genoeg vir 1 brood
375 ml louwarm melk 10 g-sakkie kitsgis
2 eiers
15 ml heuning
10 g sout
65 g (80 ml) suiker
115 g (125 ml) botter, gesmelt 700 g (1 250 ml) koekmeel
VULSEL
115 g (125 ml) botter
60 ml heuning
100 g (125 ml) witsuiker 7 ml fyn kaneel
100 g (125 ml) bruinsuiker
Meng melk, gis, eiers, heuning, sout en suiker saam in groot mengbak tot gis opgelos het. Voeg gesmelte botter by en meng met ’n houtlepel. Hou aan meng en voeg koekmeel geleidelik by tot stywe, kniebare deeg vorm. Keer deeg uit op werkvlak en knie vir 5-8 minute of tot gladde tekstuur. Smeer skoon bak met ’n bietjie olie en plaas deegbal in bak. Maak toe met kleefplastiek en laat rys op warm plek tot dubbel die volume, sowat 40-60 minute. Maak terwyl deeg rys die vulsel: Bring botter, heuning, witsuiker en kaneel in klein kastrol tot kookpunt en hou eenkant. Spuit ’n patroonpan met ’n volume van 2 liter met kleefwerende kossproei. Breek stukkies deeg af en rol in balletjies. Rol elke balletjie in bruinsuiker en pak suikerballetjies styf teen mekaar in voorbereide pan. Bedek pan met ’n kombuisdoek en laat rys weer tot dubbel die volume, sowat 20 minute. Verhit intussen oond tot 180 °C. Gooi heuningsous oor brood en plaas in warm oond. Bak 30-35 minute of tot goudbruin en gaar. Keer uit en sit voor.