Weense sjokoladebrood

(bl. 108) Jy kan ook heerlike Franse roosterbrood hiermee maak. Ek hou altyd een of twee sjokoladebrode in my vrieskas vir wanneer ek vriende wil bederf met iets spesiaals vir ontbyt. genoeg vir 2 brode

210 ml louwarm melk

10 g-sakkie kitsgis

10 g sout

30 g strooisuiker

340 g (610 ml) koekmeel, plus ekstra vir uitrol

55 g botter, in blokkies gesny

100 g sjokoladesplinters

1 eier, geklits

SJOKOLADEGLASEERSEL

125 ml room

100 g donkersjokolade van goeie gehalte, fyngekap

Meng melk, gis, sout en strooisuiker saam tot gis opgelos het. Plaas koekmeel en gismengsel in bak van elektriese menger. Gebruik die mengspaan (K-beater) en meng die mengsel sowat 8 minute by matige spoed tot ’n stywe deeg vorm. Voeg botter bietjie vir bietjie by tot alles goed gemeng is. Die deeg sal ’n gladde voorkoms hê. Plaas deeg in bak wat met olie gesmeer is. Bedek met kleefplastiek en laat rus oornag in yskas. Verhit oond tot 180 °C. Keer deeg op ’n meelbestrooide werkvlak uit en verdeel in twee. Druk deeg plat met jou hande tot sowat 1 cm dik. Sprinkel sjokoladesplinters oor die stukke deeg en rol elk in ’n stywe worsvorm op. Plaas twee deegworse in ’n broodpan van 30 x 10 cm wat met kleefwerende kossproei gespuit is of op ’n bakplaat wat gespuit is (as jy dit op ’n bakplaat bak, neem die brood ’n ander vorm aan). Laat rys op warm plek tot dubbel die volume, sowat 40-60 minute. Verf met geklitste eier en bak vir 25-30 minute of tot goudbruin en gaar. Glaseersel

Verhit room tot kookpunt en gooi oor gekapte sjokolade. Roer tot gladde mengsel. Gooi oor brood en sit voor.