GOEDVOELKOS Kook met romerige kaas
Jy gaan hulle nie op ’n kaasbord kry nie. Maar moenie romerige sagte kase miskyk nie. Want dié kase, wat nie rypgemaak word nie en dus ’n hoë voginhoud het, is só veelsydig. Ons wys hoe jy met roomkaas, maaskaas en aangesuurde room kan toor
MAASKAAS
Die tekstuur is romerig maar klonterig, dis sag op die tong en effens surerig. Omdat dit hoog in proteïen maar laag in kilojoules is, is dit gewild by mense wat hul gewig dophou. Sy het tydens die inperking haar liefde vir maaskaas herontdek, vertel kosskrywer Errieda du Toit. “Ek het die afgelope ses maande dertien kilogram afgeskud . . . volroom-maaskaas was en is steeds my groot daaglikse bederf.”
Verskeie studies het bevind hoëproteïenkosse kan jou meer versadig laat voel en help om oor die algemeen minder te eet, volgens healthline.com. Maaskaas is inderdaad net so vullend soos ’n omelet met ’n soortgelyke voedingsamestelling, het ’n Amerikaanse studie met 30 volwassenes bevind. >
< Dis ook ’n goeie keuse vir die gawe goggas in jou ingewande, nes ander gefermenteerde kosse, volgens time.com. Kyk egter op die etiket vir dié met lewende, aktiewe kulture. Eet op roosterbrood, meng in smoothies, voeg by roereier, of gebruik as basis vir doopsouse.
ROOMKAAS
Die naam beskryf nie net die tekstuur nie, maar verwys ook na een van die twee hoofbestanddele: room
(die ander een is koeimelk). Errieda besing dit op Netwerk24.com soos net sy kan: “Hap aan ’n bagel mildelik gevul met roomkaas en gerookte salm, of ’n stewige sny gebakte New York-kaaskoek en jy verstaan hoekom dit opgeneem is in die ensiklopedie 1001 Foods: The Greatest Gastronomic Sensations on Earth.
“Roomkaas het net die vermoë om alles waarmee dit in aanraking kom te verhef. Dis deels die fluweelgladde tekstuur – sag, glad en romerig maar ferm – deels die subtiele smaak en aangename sweempie surigheid wat dié vars, wit kaas so geskik maak vir sout en soet geregte.
“Ek hou van kos met ’n storie – en dit het roomkaas ook. Frankryk se kaaskundigheid is so legendaries, mens sou reken dis roomkaas se geboorteland. Die roomkaas wat ons vandag ken, is egter ’n Amerikaanse uitvindsel. En die storie daaragter dat ’n Amerikaanse kaasmaker van die staat New York dit ‘per ongeluk’ in die 1870’s ontdek het terwyl hy eintlik probeer het om die sagte, krummelrige Franse kaas neufchâtel na te maak.”
Roomkaas is, anders as aangesuurde room en maaskaas, ’n goeie bron van vitamien A – belangrik vir ’n sterk immuunstelsel, volgens Mariza van Zyl, geregistreerde dieetkundige van BeterEet, ’n aanlyn praktyk.
AANGESUURDE ROOM
Dis Franse crème fraîche – wat “vars room” beteken – of sommer die eenvoudiger anglisering creme fraiche.
“Dié deftige niggie van die vars kaas-familie is vir my soos maaskaas met sexy hoëhakskoene!” sê Errieda. Dis ’n dik room wat met ’n bakteriële kultuur versuur word, soortgelyk aan suurroom en Mexikaanse crema. Aangesuurde room het ’n neutagtige, pikante, effens suur smaak. Gebruik dit as verdikker of smaakmiddel in aptytwekkers, maaltye, soppe en nageregte.
MAAR IS DIT GESOND?
In die “ou dae” met vaste reëls en regulasies oor wat gesond is en wat nie, was dit baie makliker om die gesondheidsvoordele van produkte uit te lig, sê Mariza. “Vandag is die konteks waarin aanbevelings gemaak word, baie belangrik. Wanneer jou resep met sagte kaas ook met suiker én vet gelaai is, byvoorbeeld
’n tert, en dus baie kilojoules het, sal die potensiële ‘gesondheidswaarde’ heel anders lyk as ’n groente- of sout gereg sonder ’n kors (as jy koolhidrate beperk).
“Jy kan egter daarby baat vind as jy selfs ‘lekkernye’ berei met voedselsoorte soos kaas wat voedingswaarde het. Eerder as wat jy staatmaak op ‘leë’ kilojoules, hoogs verwerkte vetbronne of verfynde kraakbeskuitjies. Maar weet, alle suiwelprodukte sal altyd meer versadigde as onversadigde vet bevat, met gepaardgaande moontlike gesondheidsrisiko’s. (Laevet-opsies het uiteraard minder vet.) Laevet-maaskaas bevat 20% tot 30% minder kilojoules as volvet-roomkaas. En heelwat minder vet, insluitend versadigde vet.”
SÓ VERGELYK DIT MET BOTTER
1 eetlepel aangesuurde room, 1 eetlepel laevet-roomkaas en 1 opgehoopte eetlepel volvet-maaskaas het dieselfde hoeveelheid vet as 1 teelepel botter. Volvet-roomkaas is byna nes botter – 1½ teelepels roomkaas bevat dieselfde hoeveelheid vet as 1 teelepel botter.
Laevet-maaskaas, nou ja, jy kan amper die hele houertjie (250 g) eet en dit sal vetgewys gelyk wees aan 1 teelepel botter – maar aan 3 eiers se proteïen. “Weet net maaskaas voeg werklik ’n lekker hoeveelheid proteïen by jou maaltyd,” volgens Mariza. “Anders as maaskaas en harde kase tel roomkase en crème fraîche eerder as vette – en nie as bronne van proteïen nie. Dit is dus eerder die vet as proteïen wat jou meer versadig laat voel. En natuurlik is die romerigheid wat so heerlik in jou mond voel belangrik vir die ‘lekker’-effek van kos. Albei speel ’n rol by gesondheid. Tevredenheid en versadiging kan – ongeag jou gewigsverliesplan – help om jou energie-inname te verminder en jou só help om gewig te verloor, of dit te beheer.
“Dit geld natuurlik net as jy ’n lepel of twee eet. Jy verminder dus jou kilojoule- en vetinname as jy ’n lepel crème fraîche op jou aartappel sit pleks van botter. Maar wanneer jy ’n tert met laevet-roomkaas maak, ‘spaar’ jy nie regtig veel nie want jy gaan soveel meer daarvan eet.”
Roomkaas het net die vermoë om alles waarmee dit in aanraking kom te verhef. Dis deels die fluweelgladde tekstuur – sag, glad en romerig maar ferm – deels die subtiele smaak en aangename sweempie surigheid ERRIEDA DU TOIT