JOHANNA HALL se worcestersous
As jy op Worcester woon, maak worcestersous! Dis presies wat Johanna Hall gedoen het toe sy die tweede keer haar werk in die tekstielbedryf weens personeelvermindering verloor
Bliksemstraal! Met ’n habanero-rissiebyt gaan dié worcestersous van Miss J.L. Hall’s die “oe!” in jou oesters (en ’n paar anatomiese plekke) sit. Vir die minder avontuurlustige palet is daar ses ander soorte om van te kies: Ook een, No Chili, sonder skop. Daar is inderdaad ’n Miss J.L. Hall en sy woon op . . . Worcester, die plaaslike een net anderkant die berg vanaf die Paarl. Dié verduideliking is nodig, want Johanna is oorspronklik ’n lassie uit die noorde van Engeland. “Ek het Worcester(shire)sous by my grootouers, Grangran en Poppa, leer ken. Ons het hope Lea & Perrins [die oorspronklike vervaardigers] by Grangran se lekker lensiesop gegooi. Dit was nogal skerp gekruid op so ’n jong palet, maar ek was gek daarna. As student was dit my geheime wapen in ’n bolognese-sous of chili con carne.
En o ja, op roosterbrood met kaas – gerooster en gekaramelliseer. Yum! ”
Met ’n graad in die industriële ontwerp van tekstiele (geweefde stowwe) begin sy werk in ’n spokerige fabriek in Bradford, Wes-Yorkshire, die pikswart mure getuienis van toeka se stoommasjiene wat deur vuur aangedryf is. Toe sy haar werk weens personeelvermindering verloor, du dit haar lewe in ’n ander rigting. ’n Advertensie oor moontlikhede in die tekstielbedryf in die Kaapse Wynlande vang haar oog en in 2003 begin sy by Hextex op Worcester werk. Met ’n naam soos Johanna voel sy gou tuis, totdat die personeel-vermindering-spook haar in 2010 weer aan die hakskeen byt.
“Ek is seker baie mense kan hulle daarmee vereenselwig – die pynlike verlies van jou werk en inkomste wat jou laat wanhoop: Wat nou? In ’n tydskrif wat my goeie vriendin Irene bring om my op te beur, sien ek ’n artikel oor worcestersous met ’n basiese resep. Ek maak dit en dit proe heel lekker.
< Maar ek reken dit kort ’n bietjie van ’n aanpassing, begin lees en navorsing doen en plooi dit na my smaak.” Siedaar, die Original in haar reeks worcestersouse: vrugtig maar gekruie, soutig met ’n titseltjie soetheid. Umami, verduidelik sy, is jou vyfde smaaksensasie, naas soet, sout, suur en bitter. En ’n kombinasie van al vier, die smaak wat jy kry in vleissous, kragsop (broth), sop en vissous.
Met ’n liefde vir kook maar geen formele opleiding nie, trek haar “ek kan”-houding die wa deur die drif. Haar agtergrond in ’n industriële omgewing help met die kommersiële aspekte soos produkontwikkeling en koste. Die verskaffers van haar produkte het organies gegroei. “Dis belangrik om op ’n persoonlike basis met onafhanklike kleinhandelaars te werk. Hulle het ’n konneksie met jou en jou produk en is meer geneig om dit te bevorder. Ons het klante tot in Namibië. Om as een van baie mededingende handelsmerke op ’n winkelrak te staan is nie altyd die beste ding nie.”
Jo was voor die inperking gereeld op feeste en markte te sien. Haar ankermark is Pure Boland Farmer’s Market op Worcester, wat in November heropen het. Jacques du Plessis, haar verloofde, is haar regterhand. “Met ’n naam soos Johanna gaan niemand ooit weer Engels met my praat as ons trou nie,” spot sy. Hulle is die
“Huis van Terriërs” met Tilla, “ons aangenome meisie”, Cleo, Smooth en Geoffrey, genoem na die Yorkshirekrieketspeler Geoffrey Boycott.
Worcestersous is ’n generiese term: Die Engelse hooggeregshof het in 1876 beslis Lea & Perrins besit nie die handelsmerk “Worcestershire” nie. “Gelukkig vir ons. Ek weet nie hoekom L&P nie teen die beslissing geappelleer en die handelsmerk probeer beskerm het met herkomsaanwysing-status nie, soos met byvoorbeeld sjampanje of port. [En rooibostee!] Ons sakeonderneming is geregistreer in Worcester, Suid-Afrika, en die meeste mense sê ‘worcester’ en nie ‘Worcestershire’ nie.”
Suid-Afrikaners kan vleis gaarmaak soos niemand anders nie, sê Jo. Kaap-Maleise kosse met al die speserye en geure is so reg in haar kraal. Bobotie is ’n gunsteling. “As kind het my ma dit gemaak – sy het dit ‘boboteee’ genoem, met die
‘o’ uitgespreek soos ‘op’ in Afrikaans.”
Al die bestanddele is trots Suid-Afrikaans, behalwe die speserye. Dis geskik vir vegetariërs en sonder kunsmatige geur-, kleur- of preserveermiddels. Ook glutenvry en sonder bygevoegde MNG.
KONTAK 023 347 2415, 072 610 1845, info@missjlhalls. co.za, missjlhalls.co.za, Facebook @missjlhalls
Geplooi na haar smaak – en siedaar!
JOHANNA