Dier-baar: Jou TROETELDIER se wêreld

SKATTEJAG

Maak maaltye ’n speletjie. Moenie Kiets se

korrels net in sy bak sit nie, steek dit op ’n paar verskillende plekke in die huis weg. Dit sal sy natuurlike jaginstink aanwakker en ’n uitdaging wees. Speel ’n speletjie

met Wagter sodat hy sy ingeboude snuffelvermoë kan inspan. Sit sy korrels op ’n paar plekke in ’n kombers wat op ’n hoop gegooi is. En hou die pret dop terwyl hy sy kos uitsnuffel, sê Marycke Ackhurst, troeteldier gedragskundige by

Hill’s Pet Nutrition.

EINA, MAAGPYN!

Druiwe, rosyne en korente is giftig vir jou hond en kan by sommige nierversaking meebring. Vermy ook uie, knoffel en grasuie in groot hoeveelhede. Dit kan anemie veroorsaak, asook diarree, maagpyn en naarheid. Bly sommer heeltemal weg daarvan.

10% Die hoeveelheid water in droë katkos.

Anders as honde, drink katte nie baie water nie. Hulle kry normaalweg die meeste water uit hul dieet. Gee jy vir Matewis of Meraai droë kos, moet hulle sowat 1 koppie water per dag drink vir elke 4,5 kg wat hulle weeg. En in warm weer selfs meer. Katte wat geblikte kos eet, het sowat ’n derde tot helfte van die hoeveelheid water nodig. Sorg dat hulle altyd vars en skoon water het. As ’n kat meer water as gewoonlik begin drink, of water op snaakse plekke soek, is dit gewoonlik ’n aanduiding van ’n probleem, sê dr. Ingrid de Wet, veearts van die EberVet Country-dierekliniek op Somerset-Wes.

VERSEKERING

VIR JOU BESTE VRIEND

As jy jou inkopies by Checkers doen, kan jy nou jou troeteldier

vanaf R89 per maand deur hulle verseker. Om meer uit te vind, SMS PET na 38153 of gaan na checkers.co.za/petinsurance

WIE HOU WIE DOP?

Leer jou troetelvis dis etenstyd met ’n geluid, sein, of deur die tenk/ poel net op ’n sekere tyd van die dag te nader. Selfs al hou jy ’n ruk lank

op, sal sommige visse gouer reageer wanneer jy dit weer begin doen (as die eerste keer toe hulle dit moes leer). Probeer ’n teken wat jou vis kan sien of hoor om etenstyd aan te kondig. Hy gaan vinnig

agter die kap van die byl kom en nader swem as die sein gegee word, selfs al word hy later nie

met kos beloon nie.

LEKKER,

MA!

Pootjies klap, koekies bak, maak vir jou hond sy eie koekies: Maak 2 koppies droë hondekos fyn in ’n menger. Gooi die poeier in ’n mengbak en voeg geleidelik 1-1¼ koppie water by. Meng tot dit soos deeg lyk. Vorm deeg in individuele happies of koekies en maak met die agterkant van ’n lepel plat. (Dit gaan nie plat word soos gewone menskoekies nie.) Pak op ’n ongesmeerde bakplaat en bak in warm oond by 180 °C vir 30 minute of tot bros. Bêre in yskas en gebruik binne 5-7 dae. Moenie vries nie. Tuisgemaakte happies moenie meer as 10% van jou dier-bare se totale daaglikse kosinname oorskry nie, want die hitte verander die

voedingsamestelling. Resep verskaf deur Hill’s Pet

Nutrition (hillspet.co.za)

’NLANGLEWE

VIR BUNNY

Die grootste deel van ’n konyn se dieet

moet uit los hooi bestaan. En nie die kommersiële droë kos wat in die verlede so gewild was nie. Bunny het ’n veselryke dieet nodig met baie groen blaargroente,

soos kool. Wees suinig met die snoephappies en dink twee keer voordat jy ’n kleurryke boks op die winkelrak nader trek. Gee hom liefs nou en dan ment,

’n stukkie wortel of vrug.