MEER OOR DIE JAFFELPAN
Noudat Covid-19 ons laat hunker na ongekompliseerde dinge, is vintage-jaffelpanne van gietyster weer groot in aanvraag. Saam met die retro-koel ontwerp gaan dit ook oor die patina wat oor jare gevorm het.
Hoewel elektriese snackwich-roosters met nuwe ywer ingeprop word, is dit die lae tegnologie van die oorspronklike jaffelpan wat ons red van beurtkrag-ellende. Die langbeen-handvatsels wat stewig vasklamp, maak dit veilig om oor vlamme of warm kole te gebruik, terwyl die boepens-deel ’n mini-oondjie vorm. Die uitvinder, dr. Earnest Smithers van Australië, was ’n kranige kampeerder wat graag vir sy gesin die buitelug-ervaring wou gee om kos veilig oor die kole gaar te maak. Sy patent en Jafflehandelsmerk is in 1949 geregistreer.
Die Amerikaanse voorloper, die Tostwich, is drie dekades ouer, wat die nasie ’n groot voorsprong gegee het om hul kampvuur-repertoire uit te brei. Hulle noem dit ’n pie iron, wat heel beskrywend is, want eintlik is ’n jaffel maar ’n goed geseëlde broodpastei. Die ander benaming, pudgy pie iron, vat ook die pan se pokkelrondings goed vas.
Die slim ontwerp van die toeklaprooster moedig jou aan om jou grensdrade te verskuif en avontuurlik te raak. Omdat die rande reg rondom geseël word, kan jy speel met stroperige vulsels soos sagopoeding en appelkooskonfyt of souserige rafeltjievark met kweperjellie sonder dat dit uitpeul.