DIE VOLGENDE SMAAKSTERRE
Die Bombay Sandwich is ’n Indiese straatkosbroodjie wat nou deur die internasionale koswêreld ontdek word. Dit word gemaak in ’n chimta, ’n vierkantige pan met ’n ronde boepens en ekstralang handvatsels, wat dit ideaal maak om oor oop vlamme te gebruik. Die Bombay Sandwich het karaktertrekke van ons tradisionele braaibroodjie, gekruis met ’n jaffel. Die bekende elemente witbrood, tamatie, kaas en rooi-uie is daar, aangevul met beet en komkommer. ’n Masala van koljander-, kardemom- en komynsaad word kwistig oor elke lagie vulsel en bo-oor die gaar jaffel gesprinkel. Dit word afgerond met ’n vars blatjang van kruisement- en koljanderblare.
Die gourmet-toebroodjiebedryf is voortdurend op soek na die volgende smaaksterre. Daar is nou selfs ’n internasionale toekenningsgeleentheid – die Sammies – wat vir toebroodjies is wat die Grammys vir die musiekbedryf is. Die innovasie en oorspronklikheid wat hier beloon word, beïnvloed jaffel-tendense van Perth tot Pretoria.
Hipster-jaffels bevat artisan-bestanddele soos tuisgemaakte baked beans, buffelmelkmozzarella en spog-charcuterie. Smaakkombinasies soos brioche-jaffels met drie soorte kaas en truffel-bechamelsous laat ’n mens jammer voel vir mense wat brood en suiwelprodukte vermy. Vulsels soos kola-gebakte ham met avokado, tamatiesalsa, jalapeño en gesmelte kaas; hoender met amandel, aïoli, chorizo en mozzarella; of romerige roereier met kimchi en Kewpie-mayo bring glitz en glam na die eenvoudige basaar-jaffel.
Soveel vulsels, en net een leeftyd, so maak ’n plan met jou langbeenpan.