1 ronde sponskoek, 8 maniere

Koop klaargemaakte sponskoek by jou supermark en versier dit met ’n spuitsak en tuit – dis só maklik!

Uil

Kleur basiese vanieljeversiersel (bl. 4) grys en skep in spuitsak met ’n 1 cm-roostuit (sien bl. 5). Maak vinnige heen-en-weer-bewegings oor die koek terwyl jy op die spuitsak druk. Hou so aan tot hele koek bedek is. Sny oë en neus uit wit, swart en geel fondantversiersel. Sny karton-ore en druk in koek, bedek ore met grys fondantversiersel.

Jakkals

Kleur basiese vanieljeversiersel (bl. 4) oranje en skep in spuitsak met ’n 5 mm-stertuit (sien bl. 5). Bedek koek met versiersel en smeer gelyk met paletmes. Merk oë en wange op koek met mes se punt. Spuit versiersel-sterre met oorblywende versiersel om res van koek. Sny oë, wenkbroue, neus en ore uit swart en wit fondantversiersel. Sny karton-ore en druk in koek, bedek met fondantversiersel en oranje versiersel.

Beertjie

Skep basiese vanieljeversiersel (bl. 4) in spuitsak met ’n 1 cm-roostuit (sien bl. 5). Maak vinnige heen-en-weer-bewegings oor die koek terwyl jy op die spuitsak druk. Hou so aan tot hele koek bedek is. Sny oë, neus en mond uit swart, wit en pienk fondantversiersel. Sny karton-ore en druk in koek, bedek ore met vanieljeversiersel soos die gesig.

Skaap

Kleur basiese vanieljeversiersel (bl. 4) pienk, bedek koek met pienk versiersel en smeer gelyk met paletmes. Skep oorblywende versiersel in spuitsak met 1 cm-stertuit (sien bl. 5). Maak draairoomys-bewegings met spuitsak-versiersel om rand van koek. Sny oë, mond, neus en ore uit swart, pienk en wit fondantversiersel. Sny karton-ore en druk in koek, bedek ore met fondantversiersel.

Monster

Kleur basiese vanieljeversiersel (bl. 4) blou en skep in spuitsak met ’n 5 mm-stertuit (sien bl. 5). Bedek koek met versierselsterre. Sny oë, tande en neus uit wit en swart fondantversiersel. Sny kartonore en druk in koek, bedek met wit fondantversiersel en maak rand van blou vanieljeversiersel.

Varkie

Kleur basiese vanieljeversiersel (bl. 4) pienk en skep in spuitsak met ’n 1 cm-stertuit (sien bl. 5). Bedek koek met pienk versierselsterre. Sny oë, mond en neus uit swart en pienk fondantversiersel. Sny karton-ore en druk in koek, bedek met wit fondantversiersel en maak rand van pienk vanieljeversiersel.

Muis

Kleur basiese vanieljeversiersel (bl. 4) lig-oranje en skep in spuitsak met 1 cm-stertuit (sien bl. 5). Bedek koek met versiersel en smeer gelyk met paletmes. Teken hartvorm se buitelyn met mespunt, spuit sterre op dié buitelyn en merk ore binne die hartvorm. Spuit sterre met oorblywende versiersel op res van koek. Sny oë, snoet en snorbaarde uit wit en swart fondantversiersel.

Apie

Kleur basiese vanieljeversiersel (bl. 4) bruin met kakao en skep in spuitsak met ’n 1 cm-stertuit (sien bl. 5). Spuit versiersel op koek en smeer gelyk met paletmes. Merk apie se gesig met rand van skerp mes uit. Bedek res van koek met versierselsterre. Sny oë, neus en mond uit swart en wit fondantversiersel. Sny karton-ore en druk in koek, bedek met bruin versierselsterre.