Uilkoekies

Hulle is te mooi om te eet!

genoeg vir 12

• 185 g (200 ml) botter • 250 ml (210 g) strooisuiker • 5 ml vanieljegeursel • 1 heel eier • 1 eiergeel • 350 g (625 ml) koekmeel • 24 sjokoladesplinters • 12 ongepelde amandels

Verhit oond tot 180 °C. Room botter, suiker en vanielje met ’n elektriese menger. Voeg eiers by en meng goed. Voeg meel by en meng tot koekiedeeg. Draai in kleefplastiek toe en laat rus in yskas vir 25 minute. Strooi meel op werkvlak. Rol deeg uit tot sowat 5 mm dik. Gebruik koekiedrukker met deursnee van 8 cm en druk 12 sirkels uit. Sit op bakplaat wat met kleefwerende kossproei gespuit is. Sny 24 kleiner sirkels met deursnee van 2 cm uit deeg. Plaas 2 bo-op elke sirkel (vir die oë) en druk vas. Druk ’n sjokoladesplinter in elke kleiner sirkel en plaas ’n amandel op sy sykant tussen deegsirkels vir die bek. Gebruik skerp mes en sny so 5 mm-stukkie deeg van die bokant van elke sirkel af (sien foto). Druk patrone met vurk se punt en bak 12 – 15 minute of tot goudbruin en gaar.