Diersilhoeëtkoekies
(bl. 10) Maak enige kinderhart bly met hierdie mooi koekies. Dit klink dalk na moeite, maar is eintlik maklik – dit neem net tyd. genoeg vir 16
• 1 eierwit • 1 ml kremetart • 300 g versiersuiker, gesif • buitelyntekeninge van diere (soek op die internet of probeer jou eie teken) • vanieljekoekies om te versier • jel-koskleursel in die kleure
van jou keuse • spuitsak vir elke kleur
versiersel • nr. 1- en nr. 3-versierspuite • waspapier • papier en pen • maskeerband • handwerkmes
Klits eierwit en kremetart tot skuimerig. Voeg versiersuiker
by en klits stadig met elektriese klitser tot mengsel dik en wit is. Meng bietjie water by tot versiersel net-net van ’n lepel af drup. Dit moet styf genoeg wees om vorm te behou. Maak diersilhoeëtte só:
Besluit watter ontwerpe jy gaan gebruik. Maak seker die ontwerpe is kleiner as die koekies. Teken ontwerpe op papier oor. Sit die nr. 1-spuit in sak met wit versiersel. Sit papier met ontwerpe op ’n plat bord en plak ’n stuk waspapier booor vas met maskeerband. Trek die buitelyne van die ontwerpe met versiersel na en vul dan die binnekant. Sit eenkant om hard te word. Sny waspapier dan in vierkante, elkeen met sy eie versierselsilhoeët op, en verwyder elke silhoeët versigtig van waspapier. Let wel: Die silhoeëtte is baie bros – hanteer dit dus baie versigtig.
Versier koekies só: Meng nog ’n bietjie water by orige versiersel. Trek ’n lepel daardeur om die dikte te toets – dit moet binne 8-10 sekondes stol met ’n gladde oppervlak. Kleur in die kleure van jou keuse. Vul spuitsakke met nr. 3-spuite met die gekleurde versiersel. Spuit ’n netjiese raam ’n millimeter van die rand van die koekie. Vul binnekant. Sit diersilhoeët versigtig in middel van versierde koekie. Laat staan vir 2-3 uur of tot heeltemal droog.