Koekietorings
(bl. 20) Skep die “torings” deur die uitgerolde deeg in sirkels van drie verskillende groottes te sny en die gebakte koekies dan van groot na klein opmekaar te stapel. genoeg vir 20 koekies
KOEKIES • 120 g sagte botter • 70 g strooisuiker • 1 groot eiergeel • 5 ml vanieljegeursel • 180 g koekmeel
VERSIERSEL • 1 groot eierwit • 2,5 ml suurlemoensap • sowat 260 g versiersuiker, gesif • wit fondantversiersel
Verhit oond tot 180 °C. Klits botter en suiker saam tot lig en romerig. Klits eiergeel en vanielje by. Voeg meel by en roer tot sagte deeg. Draai deeg in kleefplastiek toe en sit vir 1 uur in yskas. Rol deeg tussen twee velle kleefplastiek uit. Sny sirkelvorms daaruit met ’n ronde koekiedrukker. Pak op gesmeerde bakplaat en bak in verhitte oond vir 10-12 minute tot goudkleurig en gaar. Laat op draadrakke afkoel.
Versiersel: Maak ’n harde versiersel: Klits eierwit met elektriese klitser tot baie skuimerig. Voeg suurlemoensap en dan lepels vol van die versiersuiker op ’n slag by terwyl die klitser op sy laagste spoed loop. Die mengsel moet wit word en dik wees, maar steeds dun genoeg om ná ’n paar sekondes sy vorm te verloor wanneer jy die klitserbene uitlig en “linte” vorm.
Maak só klaar: Smeer harde versiersel oor helfte van koekies en plak ’n koekie van dieselfde grootte bo-op elkeen vas. Sny vir elke koekie ’n sirkel van dieselfde grootte uit fondantversiersel en sit bo-op.