Ons bou!
Kinders wil net speel, lekkers eet en presente oopmaak, weet Amaria Erasmus, SARIE-moderedakteur, uit ondervinding. ’n Temapartytjie is die kersie op die koek
A maria Erasmus (Carstens) en haar man, Chris, volg die goue reël om vroegtydig reeds idees uit te ruil en dan te besluit wat binne hul begroting gaan pas. Hul kreatiewe vernuf word behoorlik ingespan vir alles van die dekor tot die piñata.
Sebastian het die tema vir sy vierde verjaardag self gekies. Lego is sy gunsteling-speelgoed. Die partytjie was gedurende die skoolvakansie, dus is die uitnodigings reeds ses weke voor die tyd uitgestuur om ’n aanduiding te kry van hoeveel maats kom.
As werkende ma verkies Amaria middagpartytjies sodat sy die oggend alles rustig gereed kan kry. “Jy bespaar ook om voor of ná middagete partytjie te hou. Dit skakel middagete vir die gaste uit. Grootmense kry ’n kaasbord met kraakbeskuitjies. Kinders kry nie baie eetgoed nie, want dit word dikwels vermors. En almal smul saam aan die verjaardagkoek vir iets soets.”