Oorleef jou partytjie
Die kykNET-persoonlikheid en Kwêla- veldaanbieder Minki van der Westhuizen deel ’n paar wenke om seker te maak jy as ouer oorleef ’n kinderpartytjie en die reëlings daarvoor. Sy en haar man, Ernst Joubert, het drie dogters: Katerien (4), Elise (3) en Elsa, wat vroëer vanjaar gebore is. Hou liefs jou kind se partytjie by ’n ander plek as jou huis
Vir my as ma van twee kleuters en ’n baba is dít een van die belangrikste wenke – om eerder nie ’n partytjie by jou huis te hou nie. Die moontlike chaos en skoonmaak ná die tyd gaan jou gou laat vergeet hoe lekker dit was.
Kies vroegtydig ’n datum
Dis belangrik om minstens twee maande voor die partytjie te begin beplan wat jy wil doen en waar jy dit wil hou. Kyk mooi na datums en neem in ag wanneer daar vakansiedae of langnaweke is. Vra ook ander ouers of hulle dink die datum is werkbaar. Probeer dan om ’n maand voor die tyd die datum vas te maak en die uitnodigings uit te stuur. As jy nog nie ’n plek vir die partytjie het nie, stuur ten minste ’n “hou-diedatum-oop”-uitnodiging.
Vra hulp! Stel betyds ’n gastelys saam
Die gastelys vir ’n kinderpartytjie kan nogal probleme veroorsaak. In die geval van kleuters besluit die ouers wie genooi word, maar dis belangrik om die kinders te vra watter maatjies hulle daar wil hê. As daar niggies of nefies van dieselfde ouderdom is, is dit ’n goeie idee om met hul name te begin. As jy jou gastelys moet beperk, nooi dalk net maats van jou kind se geslag. Besluit ook vroegtydig of jy ouers gaan nooi of nie, maar met kinders onder vyf jaar oud sal jy waarskynlik moet. Maak seker jou uitnodiging sê dit is vir die maatjie plus een ouer, en as die ouers daar is, moet jy aparte versnaperinge vir hulle hê. Dis ook raadsaam om voorsiening te maak vir ’n ekstra gas of twee.
Moenie met ander partytjies meeding nie
Net soos kinders nie met mekaar vergelyk moet word nie, moet dit ook nie met partytjies gebeur nie. Dit is nie ’n gewildheidskompetisie nie en wanneer jy dit beplan, moet ’n ander maatjie se partytjie nie in jou agterkop wees of bepaal wat jy gaan doen nie. Dit gaan oor jóú kind, jou begroting en wat júlle sal geniet. Jou kind sal weet dat jy dit regtig probeer spesiaal maak het vir hom of haar, en dis al wat tel. Moenie bang wees om hulp te vra nie. Jy kan beslis nie ’n kinderpartytjie op jou eie aanpak nie, en op die dag van die partytjie sal jy baie dankbaar wees vir ’n ekstra paar hande. As Ouma of Oupa daar kan wees, sal hulle natuurlik ook ’n wakende oog hou. Of nooi die peetouers of goeie vriendinne om hand by te sit.