Lagiesjellie
Elke lagie jellie moet eers stol voor die volgende een bo-op kan kom en dit verg tyd, maar dis baie lekker en kinders is mal daaroor.
GENOEG VIR 8
• 2 x 80 g-boksies geel jellie
• 2 x 80 g-boksies rooi jellie • 20 ml gelatienpoeier
• 30 ml water
• 1 x 385 g-blik kondensmelk • 250 ml kookwater
• 1 liter vanieljeroomys • sjokoladeskaafsels vir voorsit
Maak verskillende soorte jellie apart aan volgens aanwysings op boks. Gooi geel jellie sowat 1 cm hoog in 8 glasies van jou keuse. Plaas in yskas om te stol terwyl jy kondensmelkjellie maak. Meng gelatienpoeier en water en laat spons eenkant vir 1 minuut. Meng kondensmelk en kookwater. Voeg geweekte gelatien by en meng tot gelatien gesmelt het. Gooi lagie kondensmelkjellie bo-op gestolde geel jellie in glas en plaas terug in yskas. Sodra dit gestol het, gooi rooi jellie boop kondensmelkjellie. Laat stol. Herhaal proses tot glasies vol is. Skep balle vanieljeroomys bo-op en sprinkel skaafsels oor. Sit voor.