Oranje klapperkoekies

Probeer dié anderste ystervarkies. Pleks van kakaostroop maak ek ’n vanieljestroop.

GENOEG VIR 25

KOEK

• 230 g (250 ml) botter • 250 g (310 ml) suiker

• 3 eiers

• 420 g (750 ml) koekmeel • 10 ml bakpoeier

• knippie sout

• 250 ml melk

SOUS

• 500 g klapper

• oranje koskleursel

• 375 ml water

• 600 g (750 ml) suiker

• 15 ml botter

• 1 vanieljepeul, saadjies

uitgekrap

KOEK Verhit oond tot 200 ˚C. Klits botter en suiker tot lig en romerig. Voeg eiers een vir een by en klits goed ná elke byvoeging. Sif droë bestanddele saam en voeg om die beurt met die melk by bottermengsel. Meng deur. Gooi in ’n gesmeerde vierkantige pan van 22 x 22 cm en bak 20-30 minute. Haal uit en laat koud word. Sny in 25 blokkies.

SOUS Rooster klapper in warm braaipan terwyl jy heeltyd roer tot dit begin verbruin – sowat

3-5 minute. Voeg kleursel by en meng goed deur tot klapper oranje is. Plaas al die bestanddele behalwe klapper in ’n kastrol. Bring tot kookpunt en laat kook 2 minute. Doop koekblokkies vinnig in warm stroop en rol dan in klapper – as jy dit te lank in stroop los, sal dit pap word. Laat afkoel en sit voor.