Kolwyntjieversiertafel

Bak kolwyntjies in verskillende kolwyntjiepapiere of -koppies. Spuit versiersel op afgekoelde kolwyntjies en pak dit uit saam met bakkies met lekkergoed sodat die kinders hul kolwyntjies self kan versier.

GENOEG VIR 14

KOLWYNTJIES

• 125 g sagte botter

• 170 g strooisuiker

• 2 groot eiers

• 5 ml vanieljegeursel

• 280 g bruismeel

• 200 ml melk

• lekkergoed vir versiering

VERSIERSEL

• 110 g sagte botter

• 230 g versiersuiker, gesif • 25-30 ml melk • koskleursel

Verhit oond tot 180 °C. Klits botter en suiker saam tot lig en romerig. Voeg eiers een-een by en klits goed ná elke byvoeging. Voeg vanieljegeursel by en klits goed. Vou meel en melk om die beurt by bottermengsel in tot netnet gemeng. Voer ’n kolwyntjie- of muffinpan met kolwyntjiepapiere uit en verdeel beslag tussen papiere. Bak in warm oond vir 12-15 minute of tot kolwyntjies goudbruin en deurgaar is. Haal uit oond en plaas op ’n draadrak om heeltemal af te koel.

Versiersel: Klits botter tot lig en donsig. Voeg versiersuiker en helfte van melk by en klits goed. Voeg genoeg van die orige melk by om ’n gladde, smeerbare versiersel te vorm. Voeg ’n paar druppels koskleursel van jou keuse by en klits deur. Skep versiersel in ’n spuitsak en versier die afgekoelde kolwyntjies daarmee. Gaste kan nou hul kolwyntjies na hartelus versier met die lekkergoed.