’N STUKKIE SKANDINAWIË
In die hartjie van die Klein-Karoo, in die middel van nêrens, staan hierdie huis met sy mooi skoon lyne en Skandinawiese interieur. Perfek een met die landskap. Hier, naby Ladismith, het Bernhard en Salomé Teuteberg vir hulle ’n wegbreekplek kom koop
Sowat ’n jaar gelede het die Teutebergs rus-rus deur die Klein-Karoo gery. Salomé, wat oorspronklik van Namibië is, het ’n sagte plek vir hierdie landskap, want dit herinner haar aan haar heimat. Dit was hulle albei se begeerte om nog eendag ’n klein Karoo-plasie te besit, en toe hulle op Mooseberg afkom, was daar nie keer nie. Dit is ’n private wildreservaat met plotte van sowat 170 hektaar. Een van die huise was toevallig in die mark en dit was liefde met die eerste oogopslag. Die argitek Pietro Russo (www.ecomohome.com) het die huis ontwerp, laat bou en self ’n lang ruk daar gewoon. Die egpaar is albei baie omgewingsbewus en een van die grootste trekpleisters was dat die huis heeltemal ekovriendelik is. Opgaarwater word vir huis en tuin gebruik en sonkrag verskaf elektrisiteit. Die Grootrivier loop vlak by die huis verby en die uitsig is onbeperk en beeldskoon.