PLEKKIE NET VIR VROUE
Ek is bevoorreg om te woon in ’n gerestoureerde delwershuisie, wat dateer uit 1882 toe daar na spoelgoud in die Laeveld gesoek is. Dis in dié huisie waar ek ’n boudoir het met al my flessies en piepklein potjies wonderrome vir my “opdollie”-geleenthede.
Dié geheime kamertjie word vandag reggepak. In elke potjie lê soveel towerkrag, vroulikheid en geloof. Flessies wat met liefde gekoop is. Soos ek elkeen versigtig afstof en regpak, dink ek aan die jare se skoonheid wat verlore gaan.
My boudoir is eintlik net soos my SARIE. Vol verrassings, geure, kleure, geheime, nuutste neigings, maar meestal dinge wat die vroulike hart raak, opgewonde maak én hou! Connie Garrard, Kaapse Hoop (distrik Nelspruit)