Elegansie & glans
Meer as 130 jaar van
Baieberoemde en beeldskone vroue het in die verlede al juweliersware van die ikoniese Italiaanse handelsmerk Bulgari gedra. Audrey Hepburn, Elizabeth Taylor, Marilyn Monroe, Sophia Loren . ..
Ook die Suid-afrikaanse aktrise Charlize Theron is in Bulgari gesien – soos in 2012 by die Londense wêreldpremière van die fliek Prometheus. Maar dit was veral in 2008 op die rooi tapyt by die Venesiese Filmfees waar sy die asems weggeslaan het.
Die juweliersware wat sy daardie aand gedra het, is vandag deel van ’n unieke versameling, die “Heritage Collection”, bestaande uit sowat 600 geskiedkundige stukke wat Bulgari deur die dekades geskep het. Dit word uitgestal in ’n spesiale galery in hul pronkwinkel in Via Condotti in Rome. Baie van die juweliersware in die versameling is teruggekoop (of geleen) van hul eienaars om hier uit te stal, waaronder Elizabeth Taylor se diamant-en-smarag-halssnoer wat Bulgari in 2011 op die Elizabeth Taylor-veiling by Christie’s in New York gekoop het.
Bulgari is ’n handelsmerk met ’n lang geskiedenis (die ontwerphuis het in 2014 sy 130ste verjaardag gevier), maar dit was veral in die 1950’s en 1960’s dat hul juweliersontwerpe vir die eerste keer werklik onder die wêreld se aandag gekom het.
Rome was in daardie tyd dié plek om te wees en gesien te word. Dit was bekend as die “stylvolste stad op
aarde”, en was ’n uitsoek-bestemming vir internasionale regisseurs om hul rolprente te verfilm. Die hoogtepunt van die sogenaamde Dolce Vita-era (letterlik die “goeie” of “soet lewe”) was in 1962 tydens die verfilming van die fliek Cleopatra met Elizabeth Taylor in die hoofrol.
Die rykes en beroemdes het gereeld in Rome uitgehang – Ava Gardner, Humphrey Bogart, Audrey Hepburn, Gregory Peck . . . noem maar op. Baie van hierdie sterre het ook by Bulgari se winkel in Via Condotti ingeloer. Elizabeth was ’n gereelde besoeker en haar medester Richard Burton, met wie sy ’n vurige liefdesverhouding op stel aangeknoop het, het baie van haar gunsteling-stukke daar gekoop. Sy was juis lief daarvoor om tussen tonele haar Bulgari-slanghorlosie op die rolprentstel van Cleopatra te dra.
Dié spesiale verhouding met die era se glansmense het verseker dat Bulgari oor die wêreld heen bekend geraak het.
Die familie-onderneming het nederig begin. In 1880 het die Griekse silwersmid Sotirios Bulgari sy winkel in Napels geopen, ’n jaar daarna sy eerste klein winkel in Rome se Via Sistina en uiteindelik is die vlagskipwinkel in 1905 in Via Condotti geopen.
In 1934, twee jaar ná Sotirios se dood, het sy seuns, Giorgio en Constantino, die winkel laat opknap en vernuwe. Hul seuns, Paolo en Nicola, het ook later deel van die besigheid geword. Die Romeinse “V” is ná die restourasie vir die eerste keer as deel van die naam >
< van die Huis van Bulgari (geskryf as BVLGARI) gebruik om hulde te bring aan Rome en die Romeine. Die ontwerpe van Bulgari se juwele is geïnspireer deur die argitektuur van Rome. Baie fasette van die stukke weerspieël die motiewe, monumente en details van die stad: die koepels word verteenwoordig deur die kenmerkende cabochon-styl van die stene (glad en rond geslyp, met geen hoekige fasette nie) en van die geometriese ontwerpe is gebaseer op die oorblyfsels van Romeinse geboue. Vir Paolo Bulgari, voorsitter van Bulgari, begin elke ontwerp by die stene, wat altyd die kern van die ontwerp is. Baie van hul juweliersware is ’n samestelling van verskillende kleurryke stene en die ontwerp is veeldoelig, sodat dit as ’n hangertjie en as ’n borsspeld gedra kan word.
Die Serpenti (soos die een wat Elizabeth destyds gedra het) het een van Bulgari se ikoniese en mees herkenbare ontwerpe geword. Dié slang-ontwerp simboliseer wysheid, wedergeboorte en krag en is sedert die 1940’s reeds gebruik vir armbande wat gemaak is van gekleurde goue skakels wat beweeglikheid aan die ontwerp gegee het.
In die 1970’s is die eerste winkel in New York in die Pierre Hotel oopgemaak. Diana Vreeland (destydse redakteur van Vogue) en sanger Frank Sinatra was gereelde kliënte. Nicola Bulgari, ondervoorsitter van Bulgari, vertel dat die jong kunstenaar Andy Warhol gek was na hul juweliersware en dat hy van sy skilderye aangebied het in ruil daarvoor, maar hy het nie van Warhol se werk gehou nie en prontuit geweier. Min het hy toe geweet hoe waardevol Warhol se kunswerke in die toekoms sou word! Nog ander winkels in Amerika is later oopgemaak.
Die maatskappy het in 1975 vir sy top-100 kliënte elk ’n gegraveerde Bulgari Roma-horlosie as geskenk gegee. Dit het so gewild geword dat ’n hele reeks horlosies, juweliersware en ander bykomstighede, Bulgari Bulgari, twee jaar later die lig gesien het, alles gegraveer met dié dubbele handelsmerk. Die inspirasie hiervoor was antieke Romeinse munte, waarop die afbeelding van die keiser omring was deur inskripsies oor sy mag en prestige. Horlosies is steeds een van die sterprodukte van die handelsmerk.
In 1992 het die maatskappy hul eerste stap na diversifisering geneem met die bekendstelling van hul eerste parfuum, Eau Parfumée, Cologne au Thé Vert, met geure van groentee en sitrus, gemaak deur parfumeur Jean-claude Ellena.
Dit het gelei tot die ontstaan van Bulgari Parfums in 1994. Vandag is daar 57 parfuums wat geskep is in samewerking met
die parfumeurs Annick Ménardo, Alberto Morillas, Jacques Cavallier, Beatrice Piquet, Carlos Benaim, Sophie Labbe,
Olivier Polge, Daniela (Roche) Andrier, Nathalie Lorson en Jean-claude Ellena. (Altesame 29 van die geure word in Suid-afrika verkoop, en 11 daarvan is eau de parfums.) Nie lank hierna nie het die handelsmerk verder uitgebrei met handsakke en ander bykomstighede.
Verlede jaar is die winkel in Via Condotti gerestoureer onder leiding van die argitek Peter Marino. Die oorspronklike kristalkandelare, die skaars Afrika-marmerpilare en vloere van Italiaanse marmer is gepoleer; die oorspronklike uitstalkaste is gerestoureer en die vertrekke het almal weer ’n nuwe baadjie gekry. Die spesiale DOMVSgalery (Domus) waarin die “Heritage Collection” uitgestal word, is ook ingerig. Buiten die horlosies, ander juweliersware en bykomstighede wat deur die dekades geskep is, bevat dit ook duisende dokumente, ou foto’s en sketse van die ontwerpe wat gebruik is.
Ter ere van Bulgari se 130ste verjaardag is die restourasie van die beroemde Spaanse Trappe ook deur die maatskappy gefinansier omdat die eerste winkel in Rome aan die bopunt van dié trappe was.
Moontlik met die oog op nog 130 jaar van elegansie en glans . . .