KOLLAGEEN: JONK-WEES in ’n glas?
Kollageen-aanvullings is ’n gonswoord vir almal wat strewe na ’n plomper, gladder vel. Hier is wat jy moet weet
Dishier! Die nuutste hoop op ’n jeugdige vel kan jy soggens sommer voor ontbyt wegslaan.
Die gonswoord die laaste tyd is kollageen-aanvullings, hetsy in pilvorm of as drankie. Een groot aanhanger daarvan is glo die Amerikaanse werklikheidstelevisiester Kourtney Kardashian.
Kollageen is die sleutel tot ’n gesonde vel, sê dr. Nerina Wilkinson, plastiese chirurg van Kaapstad. Dié proteïen kom natuurlik in jou liggaam voor en is noodsaaklik om jou vel jeugdig te laat lyk: sterk, plomp en glad. Maar van 25 af verminder jou kollageen met sowat 1,5 % per jaar. Jou vel word dus dunner en meer geneig tot plooie.
Vroue het boonop minder kollageen as mans. Op vyftig het jy reeds sowat die helfte van die kollageen in jou lyf op ’n natuurlike manier verloor, volgens cosmedmd.blogspot. co.za. Dit word aangehelp deur omgewingsfaktore soos die son, voeding en blootstelling aan gifstowwe soos besoedeling en sigarette. Jou vel verloor mettertyd sy natuurlike elastisiteit en fermheid.
Daar is dus gedurig nuwe produkte en tegnieke op die mark wat na bewering kollageen-vlakke stimuleer. Die aktrise Gwyneth Paltrow glo bv. aan ’n kollageen-verhittingsbehandeling, ’n kombinasie van ultraklank en radiogolwe wat ou kollageen afbreek en die produksie van nuwes aanhelp.
IS AANVULLINGS ’N OPLOSSING?
Kollageen-aanvulling word toenemend gebruik vir kosmetiese en mediese prosedures, wat insluit om jou liggaam te help herstel en genees, volgens die webblad Medical News Today. Dit bied glo ’n klomp voordele: dit verminder plooie, keer velveroudering om, maak jou vel fermer en plomper en verbeter elastisiteit.
Maar nie almal is ewe opgewonde daaroor nie. Daar is nie wetenskaplike bewyse dat sulke aanvullings enige uitwerking op jou velgesondheid en voorkoms het nie, sê dr. Liow Tiong Sin, ’n mediese dokter wat in teenveroudering spesialiseer, op cosmedmd.blogspot.co.za.
Kollageen wat mondeliks ingeneem word, word afgebreek, beland in die bloedstroom en word as energie gebruik. Dit bereik nooit die vel nie. Volgens hom is daar geen waarborg dat aanvullings meer doeltreffend is vir jou vel se kollageen as enige bron van proteïen, synde vleis, kaas, eiers of bone, nie.
Om die kollageen net so te drink en te dink dit gaan in jou vel beland, gaan nie werk nie, reken dr. Wilkinson. Tog wil dit uit studies lyk asof die beste resultate verkry word met gehidroliseerde kollageen, wat die beste deur die bloedstroom opgeneem word. Met hidrolise word die “molekulêre bande” tussen die individuele kollageen-stringe afgebreek. Baie klein peptiede word dan gevorm. Dié “mini”-proteïene stuur ’n sein na jou vel dat dit beskadig is en nuwe kollageen gemaak moet word. Velprodukte met dié “sein”peptiede werk op dieselfde manier, sê sy.
Dr. Jeanne Botha, plastiese chirurg van Pretoria, glo ook kollageenaanvullings kan werk. Studies toon jy moet sowat 10 000 mg kollageen per dag inneem (beskikbaar by dokters wat op estetiese medisyne fokus) vir die volgende voordele: Gesonde vel Kollageen stimuleer die produksie van hialuronsuur en bevog dus jou vel, meer kollageen en elastien word vervaardig en daar is dus ’n verbetering in veltekstuur. Gewrigsgesondheid Kollageen speel ’n belangrike rol in die bou en ondersteuning van gewrigte en kan dalk selfs help om osteo- en rumatoïede artritis se ongemak te verlig. Die uitwerking van kollageenaanvullings is in ’n klein studie ondersoek en in die Journal of the International Society of Sports Nutrition gepubliseer. Ná vier maande was proefpersone se kniegewrigte meer beweeglik en minder pynlik. Meer navorsing is nodig, maar volgens die navorsers lyk die uitslag belowend. (Bron: www.livestrong.com) Beengesondheid Dit kan beenverlies voorkom, want dit stimuleer die aktiwiteit van osteoblaste, die selle wat been maak. Antioksidant-effek Antioksidante help beskerm liggaamselle teen skade.
KEER DIT
Jy kan wel die verlies van die kollageen wat jy reeds het, voorkom. Beskerm eerstens jou vel teen die son. Studies toon dis een van die belangrikste maniere om veroudering te beveg. Sigaretrook takel ook kollageen af. Volgens ander studies doen min slaap dieselfde.
Volgens Brent Murphy, apteker by SOLAL wat so ’n aanvulling het, bevat die meeste diëte nie kollageen nie – en veral nie vel-kollageen nie. Jy kry dit wel in (opgekookte) hoendervel. Sou jy die vel te lank kook, braai of bak, word dit vernietig.
Mariza van Zyl, dieetkundige van >
< die Paarl en skrywer van Dik vir dieet (Naledi, 2015), reken egter dis sinvol om natuurlike bronne van bioaktiewe aminosure deel van jou dieet te maak. Hoewel kollageen as sulks nie die vel bereik nie (aangesien dit deur die liggaam opgeneem word), doen die aminosure waaruit dit opgebou is, dit wel. In die brein het aminosure byvoorbeeld ’n effek op die produksie van onder meer die groeihormoon, wat op sy beurt selvernuwing stimuleer. Aminosure reguleer ook funksies soos bloedvoorsiening na die vel, beskermingsmeganismes teen sonskade en kollageenproduksie.
“Ons eet verkeerdelik nie sekere snitte van dierevleis nie, wat belangrike voedingstowwe bevat. Soos bronne van kollageen, spesifieke aminosure en vitamien A, alles belangrik vir velgesondheid. Vir ’n mooier vel verdien afval, silt (koue afval) en hoenderpote dalk ’n plekkie op jou spyskaart. Dié ‘ weggooi’kos is ryk aan vitamien A sowel as aminosure wat ook in kollageenaanvullings is.” Eet ook Helderkleurige groente/ vrugte soos tamaties, pomelo’s en waatlemoen bevat die kragtige antioksidant likopeen, wat die aftakeling van kollageen kan voorkom. Lemoene, aarbeie en soetrissies bevat vitamien C, wat belangrik is vir ’n mooi vel. Broccoli, groen blaargroente en blomkool het weer voedingstowwe wat vry radikale beveg wat kollageen aanval. Omega 3-vetsure (onder meer vetterige vis soos haring en sardiens) het anti-inflammatoriese eienskappe wat die vel help beskerm en genees. Vermy verwerkte styselkosse en suiker en verminder só inflammasie wat met die liggaam se natuurlike kollageen-produksie inmeng, beveel Mariza aan.
WAT VAN NIEPERMANENTE VULLERS?
Hialuronsuur is ’n jel-agtige stof wat met ’n fyn naald deur ’n kosmetiese kenner hoofsaaklik in jou gesig gespuit word en die weefsel oppof. Dit kom ook natuurlik in jou vel voor en bevog dit, omdat dit water aantrek en ook vogtigheid in die vel behou. Dié vullers word hoofsaaklik gebruik om jou gesig meer volume te gee, volgens dr. Botha. (Met die ouderdom verloor vel volume.)
Die vullers stimuleer ook die produksie en beskerm die kollageen op die plek waar dit ingespuit word, volgens navorsing aan die Universiteit van
VERJONGING LÊ NIE NET IN ’N POTJIE NIE – ALLES KOMPLEMENTEER MEKAAR Dr. Jeanne Botha, plastiese chirurg
Michigan se mediese skool. Omdat dit mettertyd deur die liggaam opgeneem word, is opvolgbehandelings nodig, gemiddeld elke 9 tot 18 maande. (Na gelang van die produk.)
Vullers voorsien ’n fisieke struktuur wat nie regtig deel van die liggaam is nie, sê Brent. Terwyl aanvullings voedingstowwe aan die liggaam verskaf om sy eie menslike selle te maak.
Volgens dr. Botha sal kollageenaanvullings nooit vullers vervang nie, omdat dit verskillende dinge doen. Die twee vul mekaar eerder aan.
Sy benadruk om veroudering teen te werk, is ’n holistiese benadering nodig. Dus ook wat jy eet/drink, sonbeskerming en die gebruik van botoks/vullers.
“Verjonging lê nie net in ’n potjie nie – alles komplementeer mekaar.”
BEPALINGS EN VOORWAARDES IS VAN TOEPASSING. *DIE AANBOD GELD NET VIR INTEKENING OP DIE GEDRUKTE SARIE
WEDSTRYDREËLS OP BL. 141