AUCKLAND, NIEU-SEELAND

Gedurende Mei is die Suid-eiland geklee in ’n sneeukombers.

Waarom ’n Suid-afrikaanse verhaal skryf met sy wortels in die Spaanse Burgeroorlog?

Die Spaanse Burgeroorlog was ’n botsing tussen die betreklik nuwe ideologieë van fascisme en kommunisme, en die toetsgrond vir moderne totalitarisme. Daardie denkrigtings was goed verteenwoordig in ons land ook, en daar was baie Afrikaners wat die linkse spektrum aangehang het. Tog het hul geskiedenis stom geword onder die ideologie van die Nasionale Party van Verwoerd en Malan. Hoe doen jy navorsing vir ’n verhaal soos hierdie? Wanneer ek ’n idee kry vir ’n verhaal, begin ek boeke daaroor versamel. Soms dien ’n boek selfs as sneller vir ’n verhaal. In Die twee lewens van Dieter Ondracek was dit Hannah Arendt se Eichmann in Jerusalem, en in Komplot se geval was dit George Orwell se Homage to Catalonia. Ek is ook op die uitkyk vir dokumentêre programme wat film uit die tydperk insluit, en foto’s.

Plot jy jou verhaallyn uit, sodat jy weet wie is waar in die gebeure?

Ja, en nee. Die verhaallyn is in my kop, maar om dit op skrif te kry is ’n ander storie. Ek is skaam om te bieg dat ek ’n ongeorganiseerde skrywer is. Die hele huis lê vol notaboeke en los stukkies papier waarop ek idees, flardes dialoog, karakterbeskrywings en waarnemings neergeskryf het. Soms kry ek ’n ongemaklike krieweling dat die karakters meer in beheer van die verhaal wil wees as ek, en dat ek net daar is om hul woelinge in toom te hou.