BEHANDELING VAN DIE MAAND
Luuks vir Valentynsdag
Valentynsmaand is sinoniem met bederf. En ’n groter bederf as die gesigbehandeling van Purlés se Gold, Pearls and Champagne Ceremony (R570) is skaars. Purlés is ’n reeks Franse velsorgprodukte en salonbehandelings wat onlangs in SA bekend gestel is. Vir dié behandeling word produkte wat goud, pêrels en sjampanje bevat, gebruik. Pêrelpoeier help om kollageenvervaardiging te stimuleer en fyn goue deeltjies laat lig in alle rigtings vanaf jou vel bons. Dít skep die illusie van ’n egalige veltekstuur sodat jy lyntjies en plooie moeiliker raaksien. Daarby beskerm die druiwepit-ekstrak in sjampanje jou vel teen vry radikale. Die terapeut begin deur eers jou vel te reinig en af te skilfer voordat sy ’n verfrisser en ryk serum aanwend. Dan masseer sy jou vel liggies met twee egte pêrels, wat bloedsirkulasie stimuleer vir ’n plompende uitwerking. Dit word afgesluit met ’n masker en strelende vogroom. Die behandeling is geskik vir alle veltipes en duur sowat ’n uur. My vel was ná die behandeling ferm, plomp en stralend. Dis pure bederf en perfek vir nét voor jou Valentynsafspraak.