ONS KINDERS
HULLE HELP Die talle inspirerende inskrywings van SA vroue wat omgee, het dit moeilik gemaak om nét drie finaliste te kies. Maar hier is ons Clarins/ SARIE Most Dynamic Woman of the Yearfinaliste!
Suid-Afrika is ryk aan omgeevroue wat passievol werk aan ’n beter lewe vir ons land se minder bevoorregte kinders. Dié vroue kry jy oral, in stede en in die diep platteland. Almal van ons ken iemand wat haar lewe daaraan wy om ’n verskil te maak sodat ons jeug ’n beter vandag en ’n blinker toekoms kan hê.
Verlede jaar het ons lesers weer gevra om so ’n spesiale vrou te benoem vir ons Clarins/sarie Most Dynamic Woman of the Year-toekenning. Daar was volop verhale van hoop, vrygewigheid en toewyding. Hier is die drie finaliste wat volgens ons die gees van dié toekenning in hul projekte die beste weerspieël.
“Tot nou toe het ons 169 buitestanders gehad. Dit is leerders wat nie vir ons residensiële program gekeur is nie, maar wat wel die eindronde van die keuringsproses gehaal het. Ons ondersteun hulle steeds en help hulle om by ander skole in die omgewing in te skryf. Hulle het oor naweke en tydens skoolvakansies toegang tot ons geriewe,” voeg sy by.
Selfs nadat hulle, inwonende leerders sowel as buitestanders, matriek geskryf het, maak Leigh seker dat Sumbandila voortgaan om hulle te help. “Ons doen alles in ons vermoë om vir hulle plek te kry by universiteite en om vir hulle beurse te reël sodat hulle hul ideale kan bereik,” sê sy, “en ons mentor hulle steeds. Danksy die nodige finansiering kon ons selfs ’n huis in Pretoria koop vir ons oudleerders wat daar studeer.”
“Sumbandila” is Venda vir “wys my die weg” – en vir Leigh is dit presies wat sy probeer doen. “Ons sê altyd dieselfde as Imtiaz Sooliman van Gift of the Givers, ‘Dis deur ons, nie van ons nie’. Hierdie kinders is in elk geval ongelooflik – ons het hulle maar net ’n hupstootjie gegee.”
Leigh se mikpunt is om vir meer studente beurse te gee en om die geriewe by Ridgeway College te verbeter. “Ons het nie veel nie, maar ons doen beslis baie met ’n bietjie.”
Vir nog inligting, besoek www.sumbandila.org of stuur e-pos na lbristow@mweb.co.za Op ’n somerdag, tussen die jakarandabloeisels en die vrolike getjirp van voëls deur, sit en lees kinders in hul leestuin by die Laerskool Nooitgedacht in Lanseria, Johannesburg. Dís waar die hoofsentrum van Ripple Reading is.
In 2009, nadat sy begin skoolhou het by Nooitgedacht, ’n skool vir meestal minder bevoorregte leerders, was Riana geskok toe sy agterkom dat die kinders in haar klas ’n reusagtige akademiese probleem het. “Ek het vir graadsewes klas gegee, en ek kon nie glo dat hulle nie kan lees nie. Sonder dié vaardigheid, het ek geweet, was daar geen hoop vir hulle nie,” vertel sy.
Maar Riana, ’n selferkende raakvatter, het besluit sy gaan ’n oplossing vind vir dié probleem wat oor haar pad gekom het. “Daar was ’n klein, leë gebou op die skoolgrond, en ek het die hoof gevra of ons dit kan gebruik om die kinders te toets en te leer. Hy het goedgunstiglik toestemming gegee en dit is nou ons leessentrum. Ons gaan haal kinders uit hul klas, bring hulle hierheen en elke >