Parfuum...

. . . se oomblik in die geskiedenis

Deur die millennia het parfuum verskeie oomblikke op die skoonheidsverhoog gehad, maar die interessantste verhale oor die wonderwêreld van geur kom uit die antieke beskawings.

Die Egiptenare was voor in die koor en het reeds duisende jare gelede die idee agter aromaterapie verstaan: dat die regte kombinasie van bestanddele byvoorbeeld angs kan verlig (kaneel, mirre en wierook was gunstelinge). Die Grieke het geur later ’n stappie verder geneem en welriekende plante en hars ( resin) fyngemaal en met olie gemeng en so die eerste “parfuum” geskep wat op die vel gebruik kon word.

Maar dit was die antieke Romeine wat parfuum sy naam gegee het. Hulle het dit per fumum genoem, wat “van rook” beteken, omdat die eerste “parfuums” verkry is deur aromatiese hout en gom te verbrand. Vroue steur hulle nie meer aan parfuumreëls soos dat jy ligte geure net in die dag of somer kan dra nie. Ons volg eerder ’n individualistiese benadering, sê Nicola Cooper, ’n tendenskenner van Johannesburg. Ons gebruik verskillende parfuums, afsonderlik en saam, om ons eie unieke geure te skep, sê sy.

Dié wat dit kan bekostig, gebruik sommer vier tot ses parfuums op verskillende tye van die dag.

Om parfuum laag op laag aan te wend ( layering) begin ook uiteindelik plaaslik vlamvat. Vroue gebruik bv. parfuum-olies (wat ons al hoe meer op die rak sien) saam met ander parfuums op hul spieëltafel, of hulle gebruik ’n geurige lyfroom saam met hul gunsteling-parfuum as ’n bekostigbare alternatief, sê Nicola. Só druk jy jou persoonlikheid met ’n eie unieke geur uit.