’n Plaasskooltjie van hoop
Skoonheidskundige Nicolette van der Merwe se lewe het handomkeer verander toe sy en haar man hulle op sy afgeleë plaas in die TankwaKaroo gevestig het. Vandag maak sy ’n verskil as hoof van ’n plaasskooltjie
Sywou nog altyd ander help. Nadat Nicolette van der Merwe in 2005 as skoonheidsterapeut in die Paarl gekwalifiseer het, wou sy vroue beter laat lyk en voel. Maar haar planne het noodgedwonge verander toe sy trou met ’n boer op ’n afgesonderde plaas in die Tankwa-karoo. Gou het sy ’n nuwe uitdaging gesien.
“Ek en Francois is in 2008 getroud. Die naaste groot dorp aan ons is Calvinia, sowat 120 km van die plaas. Die eenmanskooltjie, die Laerskool Elandsvlei op die buurplaas, het vir my gelyk na ’n gulde geleentheid om die plaaskinders in die omgewing te help en my in my werk uit te leef. Ek wou nie net huisvrou wees nie,” sê Nicolette, wat ook ma van ’n tweejarige tweeling, Benjamin en Sarel, is.
Vandag leef sy haar droom uit om ander te help as skoolhoof, maar dit was nie altyd ’n maklike pad om te stap nie. Sy het aanvanklik geen opleiding as onderwyseres gehad nie – en sy wou boonop die onderwysdepartement oortuig dat hulle ’n graad R-klas by die skool nodig het. “Ons het gesien die outjies wat nie daardie voorbereiding kry nie, sukkel vreeslik in graad 1. Baie van dié kinders kom uit moeilike omstandighede,” vertel sy.
Toe bel Nicolette – 37 keer – die departement van onderwys om te vra of hulle ’n graad R-klas kan instel. En wraggies, van 2009 tot 2011 het sy die graad R-klas behartig. Sy het selfs ses maande gratis gewerk, maar is daarna wel vergoed. Danksy Francois en haar familie se ondersteuning kon sy tussendeur ma en boervrou wees, en onderwys deur Unisa studeer. Sy het einde 2012 haar graad verwerf.
In 2013 het sy oorgeneem toe die vorige hoof afgetree het. “Baie dinge kon teen my tel toe ek vir die pos aansoek gedoen het – ek was jonk, het nog nie my graad gehad nie, maar