Rooibos superkos
Dis een van die natuur se wonderwerke danksy ’n hele weermag antioksidante wat jou gesondheid kan beskerm en langlewendheid kan aanhelp. Boonop is dit goed vir jou vel
Distrots Suid-afrikaans, so eie aan ons land soos braaivleis, rugby en sonskyn. ’n Magiese plant wat natuurlike helende vermoëns besit. Hoewel rooibos reeds eeue lank gebruik word, is die voordele nie meer net anekdoties nie. Wetenskaplikes oor die wêreld heen ondersoek dit vir ’n beter begrip van hoekom dit so goed is vir ons gesondheid, en sedert die jare vyftig is meer as honderd studies oor rooibos in wetenskaplike joernale gepubliseer.
Ons bekyk die uniekheid van dié bossie wat deel is van die Kaapse fynbos-rykdom.
Rooibos bevat
Antioksidante wat jou vel en gesondheid beskerm teen vry radikale (onstabiele molekules wat selskade aanrig). Vry radikale floreer op sonlig, sigaretrook en besoedeling.
Flavonoïede wat as antioksidante met kankerwerende, immuunversterkende eienskappe optree.
GOED VIR Beskerm teen kanker
Kragtige plantchemikalieë (wat onder meer ook as antioksidante optree) in die plant kan kanker voorkom of vertraag.
Rooibos kan moontlik sekere gene aanskakel wat help om kankerselle af te breek. Baie studies met rotte en muise het bewys dit kan die ontwikkeling van velkanker-letsels vertraag, voorkankeragtige letsels in die lewer verminder en die ontwikkeling van papillome (goedaardige gewasse) in die slukderm strem. *Verskeie artikels oor rooibos en kanker het in mediese joernale soos
en
GOED VIR Die hart en ander organe
Ses koppies rooibostee (deur die dag) kan help om jou hart gesond te hou.
Dit beskerm die lipiede in jou bloed teen vry radikale, versterk vlakke van glutatioon (die liggaam se eie super-antioksidant) en verbeter die bloedlipied-profiel. Dit verminder die totale cholesterolvlakke, veral die vlakke van “slegte” Ldl-cholesterol.
Dit strem die aktiwiteit van ’n ensiem (ACE) wat vermoedelik betrokke is by die ontwikkeling van hartsiektes. Ace-inhibeermiddels word dan ook gebruik om hartsiektes en hoë bloeddruk te behandel.
’n Antioksidant in rooibos, chrysoeriol, kan vaskulêre hartsiektes voorkom en behandel. Dit kan ook die lugpyp verwyd (brongodilator), bloeddruk help verlaag en spierspasmas verlig.
GOED VIR Stres
Rooibos verminder die produksie van kortisol, die sogenaamde streshormoon. En dus ook die vernietigende uitwerking van stres op die liggaam.
Streshormone maak jou boonop honger en moedig die stoor van vet aan. Jy sit dan gewig aan. Oorgewig word gekoppel aan onder meer hoë bloeddruk, hartsiekte, metaboliese sindroom, insulienweerstandigheid en tipe 2-diabetes.
GOED VIR Diabetes
Aspalatien, rooibos se hoofantioksidant, help muise met tipe 2diabetes se spierselle om glukose meer doeltreffend te gebruik en dus bloedsuikervlakke stabiel te hou. (Noodsaaklik om diabetes beter te bestuur.) Bloedsuiker wat op en af wip, kan uiteindelik tot tipe 2-diabetes lei.
Dit beskerm rotte met diabetes teen vry radikale. En word aanbeveel vir die voorkoming en behandeling van bloedvatskade by diabete.
GOED VIR Die lewer
Rooibos voorkom die oormatige indringing van vetweefsel in die lewer – ’n potensieel ernstige toestand. Dit help ook beskadigde lewerselle herstel en word aanbeveel as ’n doeltreffende hulpmiddel om lewersiektes te voorkom en behandel.
GOED VIR Allergieë en inflammasie
Dit help om allergieë te verlig deur die produksie van ’n ensiem (sitochroom P450) aan te wakker wat allergene help metaboliseer.
Die antioksidant-effek van rooibos kan help om inflammasie te verminder en só kolitis help beveg. (’n Siekte wat sere in die kolon veroorsaak.) >